अर्थमन्त्री डा. स्वर्णिम वाग्लेले आगामी आर्थिक वर्षको बजेट निर्माण प्रक्रियामा अन्तिम समयसम्म पनि सुझाव लिन सरकार खुला रहेको बताएका छन्। उनले १४ जेठसम्म सरोकारवाला निकाय, विज्ञ तथा सांसदहरूबाट प्राप्त सुझावहरूलाई समेट्ने अधिकतम प्रयास गरिने स्पष्ट पारे।
मंगलबार संसदको अर्थ समितिमा बजेट निर्माणसँग सम्बन्धित छलफलका क्रममा उनले बजेट निर्माण प्रक्रिया अत्यन्तै चापपूर्ण समयसीमाभित्र भइरहेको भए पनि सरकार समावेशी ढंगले अघि बढ्न प्रतिबद्ध रहेको बताए। “जेठ १५ को अपराह्न बजेट पेस हुन्छ, तर त्यसको अघिल्लो रातसम्म बजेट लेख्ने काम चलिरहन्छ,” उनले भने, “मध्यरातसम्म पनि टोली काममै हुन्छ, र बिहानतिर मात्र अन्तिम तयारी सकिन्छ।”
उनले बजेट सार्वजनिक हुने समयबारे व्यंग्यात्मक शैलीमा थपे, “जेठ १५ को दिउँसो बजेट सार्वजनिक गरिन्छ, किनकि अर्थमन्त्रीले कम्तीमा २–३ घण्टा सुत्ने समय पाओस् भन्ने सोचले त्यसो गरिएको हो।” यस अभिव्यक्तिले बजेट निर्माण प्रक्रियाको व्यस्तता र दबाब झल्काएको छ।
अर्थमन्त्री वाग्लेले यसपटकको बजेट निर्माणमा समय अभाव भएको स्वीकार गरे। उनका अनुसार बजेटको प्रारम्भिक प्रक्रिया फागुन १९ अगावै सुरु भइसकेको थियो, जब उनीहरू चुनावी प्रक्रियामा व्यस्त थिए। सरकार गठन भएर काम सुरु गर्दा चैतको मध्य भइसकेकोले बजेट निर्माणका लागि पर्याप्त समय नपाइएको उनले बताए।
“हामी सरकारमा आउँदा बजेटको प्रारम्भिक ढाँचा तयार भइसकेको थियो,” उनले भने, “त्यसैले समय सीमित भए पनि उपलब्ध समयलाई अधिकतम उपयोग गर्दै सबै पक्षका सुझाव समेट्ने प्रयास गरिरहेका छौँ।”
उनले बजेट निर्माणमा सांसदहरूको भूमिका महत्त्वपूर्ण रहेको उल्लेख गर्दै सबै दल र प्रतिनिधिहरूका मागहरूलाई सकेसम्म समावेश गर्ने प्रतिबद्धता जनाए। यसले बजेटलाई समावेशी र व्यवहारिक बनाउने विश्वास पनि उनले व्यक्त गरे।
यसै क्रममा अर्थमन्त्री वाग्लेले सरकारको बजेट नीति चुनावी वाचापत्रमा आधारित हुने स्पष्ट पारे। उनले च्बकतचष्थब क्धबतबलतचब एबचतथ नेतृत्वको सरकारले चुनावअघि सार्वजनिक गरेको वाचापत्र, सरकार गठनपछि ल्याइएको ‘एक सय रणनीति’ र हाल प्रस्तुत नीति तथा कार्यक्रमबीच समन्वय गर्दै बजेट ल्याइने बताए।
“वैशाख ३१ गते बजेटको सिद्धान्त तथा प्राथमिकता सार्वजनिक हुनेछ,” उनले भने, “त्यसले बजेट कुन आधारमा तयार हुँदैछ भन्ने स्पष्ट पार्नेछ, र हामी वाचापत्रमा उल्लेखित कार्यक्रमहरूलाई प्राथमिकतामा राख्नेछौँ।”
उनका अनुसार बजेटमा समेटिने कार्यक्रमहरू कार्यान्वयनमुखी हुनेछन् र सरकारले घोषणामै सीमित नरही परिणाममुखी कार्यशैली अपनाउनेछ। वाचापत्रका प्रतिबद्धता पूरा गर्न सरकार कटिबद्ध रहेको उनले दोहो¥याए।
समग्रमा, अर्थमन्त्री वाग्लेले समयको दबाबबीच पनि समावेशी, पारदर्शी र वाचापत्रमा आधारित बजेट ल्याउने प्रतिबद्धता व्यक्त गरेका छन्। आगामी बजेटले आर्थिक सुधार, विकास र जनअपेक्षा पूरा गर्ने दिशामा ठोस आधार तयार गर्ने अपेक्षा गरिएको छ।
