साल्ट ट्रेडिङ कर्पोरेशन लिमिटेडको आम्दानी बढेसँगै नाफामा पनि वृद्धि भएको छ । कम्पनीले चालु आर्थिक वर्ष २०८२/८३ को तेस्रो त्रैमाससम्म ९ करोड ५७ लाख रुपैयाँ खुद नाफा आर्जन गरेको छ ।
यो रकम अघिल्लो आवको सोही अवधिको तुलनामा ९४.४७ प्रतिशतले बढी हो । अघिल्लो आवको सोही अवधिमा कम्पनीले ४ करोड ९२ लाख रुपैयाँबराबरको खुद नाफा कमाएको थियो ।
चालु आवको नौ महिनामा कम्पनीले बिक्रीमार्फत ६ अर्ब ६१ करोड रुपैयाँ आर्जन गरेको छ । अघिल्लो आवमा बिक्रीमार्फत ६ अर्ब ७८ करोड रुपैयाँ आम्दानी भएको थियो । कम्पनीले यो अवधिसम्म २३ करोड ८२ लाख रुपैयाँबराबरको अन्य आम्दानी गरेको छ ।
यस्तै, कम्पनीले कर्मचारी खर्च २७ करोड ९२ लाख, ब्याज खर्च १८ करोड ६३ लाख, ह्रासकट्टी खर्च १ करोड ३ लाख र ९ करोड ६६ लाख रुपैयाँबराबरको प्रशासनिक खर्च गरेको छ । कम्पनीको जगेडा तथा मुनाफा कोषको आकार १ अर्ब ४० करोड रुपैयाँ रहेको छ । कम्पनीको चालु सम्पत्ति ७ अर्ब ९४ करोड र कुल चालु दायित्व ८ अर्ब ४९ करोड रुपैयाँ रहेको छ ।
चालु आवको तेस्रो त्रैमाससम्ममा कम्पनीको प्रतिसेयर आम्दानी (ईपीएस) ३६.१९रुपैयाँ, प्रतिसेयर नेटवर्थ ३७५.७ रुपैयाँ, प्रतिसेयर कुल सम्पत्तिको मूल्य २ हजार ९०६.३० रुपैयाँ र मूल्य आम्दानी अनुपात १८५.०४ गुणा कायम भएको छ ।
