नेपाल एसबिआई बैंक लिमिटेडले २१ जुन २०२६ मा “अन्तर्राष्ट्रिय योग दिवस” को अवसर पारेर देशका सातै प्रदेशमा विशेष योग कार्यक्रमहरू भव्य रूपमा आयोजना गरेको छ। कर्मचारीहरूको शारीरिक तन्दुरुस्ती, मानसिक स्वास्थ्य र दैनिक जीवनमा योगको महत्वबारे सचेतना जगाउने मुख्य उद्देश्यका साथ सञ्चालित यस अभियानमा बैंकका सबै प्रदेशका कर्मचारीहरूले उत्साहपूर्वक सहभागिता जनाएका थिए। यस किसिमको स्वास्थ्य अभिवृद्धि गतिविधिले कर्मचारीहरूलाई थप क्रियाशील बनाउन, आपसी सहकार्य बढाउन र स्वस्थ जीवनशैली अपनाउन महत्त्वपूर्ण प्रेरणा मिलेको बैंकले जनाएको छ।
यसै सन्दर्भमा, काठमाडौंमा आयोजित मुख्य समारोहमा बैंकका प्रबन्ध सञ्चालक तथा प्रमुख कार्यकारी अधिकृत राम कुमार तिवारी, अन्य वरिष्ठ पदाधिकारीहरूका साथै १५० भन्दा बढी कर्मचारीहरूको उल्लेखनीय उपस्थिति रहेको थियो। यस्ता स्वास्थ्यमैत्री पहलहरूले कर्मचारीहरूको मानसिक स्वास्थ्य र उत्पादकत्वमा सकारात्मक प्रभाव पार्ने मात्र नभई कार्यस्थलमा एउटा जीवन्त र ऊर्जावान् संस्कृतिको विकास गर्ने विश्वास बैंकले लिएको छ।
विगत ३२ वर्षदेखि नेपाली बैंकिङ क्षेत्रमा निरन्तर र विश्वसनीय सेवा प्रदान गर्दै आइरहेको नेपाल एसबिआई बैंकले हाल देशैभर रहेका आफ्ना १०३ शाखा, २२ एक्स्टेन्सन काउन्टर, ७ प्रादेशिक कार्यालय, २१ शाखारहित बैंकिङ सेवा, १२७ एटिएम र १ कर्पोरेट कार्यालयमार्फत ग्राहकहरूलाई आधुनिक बैंकिङ सेवा उपलब्ध गराउँदै आएको छ।
