चालु आर्थिक वर्ष २०८२/८३ सकिन एक दिन मात्रै बाँकी रहँदा राजस्व संकलन तीव्र भएको देखिएको छ । विगतमा झैं यस वर्ष पनि आर्थिक वर्षको अन्तिमतिर राजस्व संकलन तीव्र भएको पाइयो । सोही परम्पराअनुसार हिजो बुधबार एकै दिन सरकारले २१ अर्ब १६ करोड ९२ लाख रुपैयाँ राजस्व संकलन गरेको छ । जसमध्ये १८ अर्ब ६६ करोड ७९ लाख रुपैयाँ कर राजस्व रहेको छ ।
महालेखा नियन्त्रक कार्यालयका अनुसार, चालु आवको असार ३१ गतेसम्म सरकारले कुल १२ खर्ब २४ अर्ब ८० करोड ९० लाख रुपैयाँ राजस्व संकलन गरेको छ । असार ३१ गते बुधबारसम्म सरकारले कुल लक्ष्यको करिब ८३ प्रतिशत राजस्व संकलन गर्न सकेको छ । महालेखाको अनुसार, यो संकलन सरकारले चालु वर्षका लागि तय गरेको कुल १४ खर्ब ८० अर्ब रुपैयाँको वार्षिक लक्ष्यको ८२.७६ प्रतिशत हुन आउँछ ।
विगतको तुलनामा यस वर्ष राजस्व संकलनमा सुधार देखिएको छ । महालेखाले सार्वजनिक गरेको विवरणअनुसार, गत आर्थिक वर्ष २०८१/८२ को असार ३१ गतेसम्म सरकारले ११ खर्ब ४० अर्ब ३६ करोड ६१ लाख रुपैयाँ मात्र राजस्व संकलन गर्न सकेको थियो । गत वर्षको सोही अवधिको तुलनामा यस वर्ष राजस्व संकलन ७.४० प्रतिशत अर्थात् ८४ अर्ब ४४ करोड २९ लाख रुपैयाँले वृद्धि भएको महालेखा नियन्त्रक कार्यालयले जनाएको छ ।
यस वर्ष प्राप्त कुल राजस्वमध्ये सबैभन्दा ठूलो हिस्सा कर राजस्वको रहेको छ । बुधबारसम्म ११ खर्ब ५ अर्ब ९२ करोड ५६ लाख रुपैयाँ कर राजस्व संकलन भएको तथ्यांक छ, जुन लक्ष्यको ८३.४३ प्रतिशत हो । त्यस्तै, गैरकर राजस्वतर्फ १ खर्ब १८ अर्ब ८८ करोड ३४ लाख रुपैयाँ संकलन भएको महालेखा नियन्त्रक कार्यालयले जनाएको छ । यो कुल गैरकर राजस्व लक्ष्यको ७६.९९ प्रतिशत हो । गत वर्षको तुलनामा यस वर्ष कर राजस्व ७.३४ प्रतिशत र गैरकर राजस्व ८.०२ प्रतिशतले बढेको तथ्यांकमा उल्लेख छ ।
त्यसैगरी, अनुदान प्राप्तिको अवस्थामा पनि यस वर्ष उल्लेख्य सुधार भएको देखिन्छ । चालु वर्षमा सरकारले कुल ५३ अर्ब ४४ करोड ६९ लाख रुपैयाँ वैदेशिक अनुदान प्राप्त गर्ने लक्ष्य राखेकोमा असार ३१ गतेसम्म ५८.५ प्रतिशत अर्थात् ३१ अर्ब २६ करोड ४१ लाख रुपैयाँ प्राप्त भएको छ । यो गत वर्षको तुलनामा ३४.७५ प्रतिशतले बढी हो । गत वर्ष यसै अवधिसम्म सरकारले जम्मा २३ अर्ब २० करोड १६ लाख रुपैयाँ अनुदान प्राप्त गरेको थियो ।
बिहीबार (आज) असार ३२ गते आर्थिक वर्षको अन्तिम दिन भएकाले थप राजस्व संकलन भई कुल संकलनको दर अझै बढ्ने अनुमान गरिएको महालेखा नियन्त्रक कार्यालयले जनाएको छ ।
