गत आर्थिक वर्ष २०८२/८३ मा रु. ५७ करोड १५ लाखभन्दा बढी राजस्व संकलन भएको छ । यातायात व्यवस्था कार्यालय जनकपुरधाम, धनुषाले सेवाग्राहीबाट गत आर्थिक वर्षमा उक्त राजस्व संकलन गरेको हो ।
नयाँ सवारी दर्ता, नवीकरण तथा सवारी चालक अनुमतिपत्र वितरण लगायतबाट आव २०८२/८३ मा सो कार्यालयले रु. ५७ करोड १५ लाख ३० हजार ६३६ राजस्व संकलन भएको कार्यालय प्रमुख वासुदेव मल्लले बताएका छन् ।
उक्त राजस्व अघिल्लो आर्थिक वर्ष २०८१/८२ को तुलनामा रु. नौ करोड ५४ लाख १३ हजार ३४४ कम संकलन भएको हो । सो कार्यालयबाट अघिल्लो आर्थिक वर्ष २०८१/८२ मा विभिन्न शीर्षकमा रु. ६६ करोड ६९ लाख ४३ हजार ९८० राजस्व संकलन भएको थियो ।
गत भदौ २३ र २४ गतेको जेनजी आन्दोलन, आर्थिक वर्षको अन्तिम महिनामा यातायात व्यवस्था विभागले सफ्टवेयर निर्माणका क्रममा ढिलाइ भएको कारण राजस्व संकलनमा कमी आएको बताइन्छ ।
कार्यालय प्रमुख मल्लका अनुसार आव २०८२/८३ मा मोटरसाइकल १६ हजार ९५७ वटा, बस/ट्रक १८७ वटा, टेम्पो/विद्युतीय रिक्सा एक हजार ९०२ वटा, ट्याक्टर एक हजार २२ वटा, जिपरकार २२६ वटालगायत गरी २१ हजार २९४ वटा नयाँ सवारी दर्ता भएको छ । यस अवधिमा नयाँ र वर्ग थप गरी १३ हजार ३३८ जनालाई सवारी चालक अनुमतिपत्र वितरण गरिएको थियो ।
