नवलपरासीको हुप्सेकोट गाउँपालिका–५ धौवादीमा रहेको फलाम खानीबाट व्यावसायिक रूपमा फलाम उत्खनन हुने भएको छ ।
धौवादी फलाम कम्पनी लिमिटेडले करिब ४१ वर्ग किलोमिटर क्षेत्रफलमा फैलिएको खानीबाट ९ करोड ६० लाख धाउ फलाम उत्खनन गर्न सकिने योजनासहितको प्रतिवेदन खानी तथा भू–गर्भ विभागमा पेस गरेको छ । प्रस्तावित योजना स्वीकृत भएपछि फलामको वास्तविक भण्डारको अवस्था पहिचान गर्न थप अनुसन्धान र उत्खननको काम अघि बढाउने कम्पनीको तयारी छ ।
कम्पनीले खानी क्षेत्रलाई धौवादी पोखरी र दुर्लुङ गरी दुई भागमा विभाजन गरेको छ । धौवादी पोखरी ब्लक करिब २५ वर्ग किलोमिटर र दुर्लुङ ब्लक १६ वर्ग किलोमिटर क्षेत्रमा फैलिएको छ ।
नेपालमै फलामको व्यावसायिक उत्पादन गर्ने लक्ष्यसहित स्थापना भएको कम्पनीले भूमिगत फलामको नमुना संकलन तथा परीक्षणका लागि विभिन्न १२ स्थानमा ड्रिलिङ गरिसकेको जनाएको छ । कम्पनीका निर्देशक शैलेशकुमार थापाका अनुसार ती स्थानमा गरी करिब एक हजार ५०० मिटर ड्रिलिङ सम्पन्न भएको छ ।
कम्पनीले खानी सञ्चालनका लागि आवश्यक वातावरणीय प्रभाव मूल्यांकनको काम अघि बढाइरहेको छ । साथै, विस्तृत परियोजना प्रतिवेदन तयार गर्ने प्रक्रिया पनि चाँडै सुरु गर्ने कम्पनीले जनाएको छ । निर्देशक थापाका अनुसार, खानी सञ्चालनमा आएपछि उत्पादित फलामजन्य वस्तुले मुलुकको समग्र मागको करिब २५ प्रतिशत आयात प्रतिस्थापन गर्न सक्ने देखिन्छ ।
खानी सञ्चालनबाट ठूलो संख्यामा रोजगारी सिर्जना भई राष्ट्रिय अर्थतन्त्रमा योगदान पुग्ने उनको विश्वास छ । खानीसम्म पुग्न आवश्यक पूर्वाधार निर्माण तथा सडक स्तरोन्नतिको काम भइरहेको कम्पनीले जनाएको छ ।
