सार्वजनिक खरिद अनुगमन कार्यालयले विभिन्न सार्वजनिक निकायबाट कालोसूचीमा राख्न सिफारिस गरिएका २० निर्माण व्यवसायी तथा आपूर्तिकर्तासँग पुनः लिखित स्पष्टीकरण माग गरेको छ ।
कार्यालयले यसअघि सम्बन्धित व्यवसायी तथा आपूर्तिकर्तालाई कालोसूचीमा राख्न नपर्ने आधार, कारण र प्रमाण भए ३० दिनभित्र लिखित स्पष्टीकरण पेस गर्न पत्राचार गरेको थियो । तोकिएको समयभित्र स्पष्टीकरण पेस नभएपछि कार्यालयले पुनः सार्वजनिक सूचना जारी गर्दै सात दिनभित्र स्पष्टीकरण पेस गर्न आग्रह गरेको हो ।
कालोसूचीका लागि सिफारिस गर्ने सार्वजनिक निकायमा जलस्रोत तथा सिँचाइ विकास डिभिजन कार्यालय बाँके, प्रदेश स्वास्थ्य आपूर्ति व्यवस्थापन केन्द्र धनगढी, सहरी विकास तथा भवन निर्माण कार्यालय धनगढी, तुलसीपुर उपमहानगरपालिका तथा सडक डिभिजन दमौली, विराटनगर, ललितपुर, इलाम र सुर्खेतलगायत रहेका छन् ।
सिफारिसमा परेका व्यवसायी तथा आपूर्तिकर्तामा इन्द्र कन्स्ट्रक्सन एन्ड सप्लायर्स, डी.बी. मेडिसिन सेन्टर, जीएनएस–पन्त जे.भी., तारा लक्ष्मी–ममता मन्जु जे.भी., भ्याली निर्माण सेवा, भूमि–हिमालयन जे.भी., अनुपमा निर्माण सेवा र अरनिको/लामा जे.भी. छन् ।
त्यस्तै, जिवि मेटल क्राफ्ट एन्ड सप्लायर्स, पारस निर्माण सेवा, गौरीगोमा निर्माण सेवा, अग्रिम उन्नती निर्माण सेवा, मृतसंजीवनी–लोहनी एन्ड ब्रदर्स जे.भी., दर्शन निर्माण सेवा, शंकरमाली निर्माण सेवा, शुभम कन्स्ट्रक्सन, आई.बी. पाण्डे कन्स्ट्रक्सन, लक्ष्मी निर्माण सेवा, मालाया कन्स्ट्रक्सन र जनता बिल्डर्स पनि सिफारिसमा परेका छन् ।
कार्यालयले तोकिएको अवधिभित्र स्पष्टीकरण पेस नगरेमा प्रचलित कानुनअनुसार थप प्रक्रिया अघि बढाउने जनाएको छ ।
