रोजगारीका लागि विदेशिने नेपालीको संख्या उच्च रहेको छ । वैदेशिक रोजगार विभागका अनुसार, चालु आर्थिक वर्ष २०८३/८४ को असोज महिनामा मात्रै ७३ हजार ७६५ जना नेपालीले वैदेशिक रोजगारीका लागि अन्तिम श्रम स्वीकृति लिएका छन् । यसले स्वदेशमा पर्याप्त रोजगारीका अवसर सिर्जना हुन नसक्दा वैदेशिक रोजगार अझै पनि नेपालीका लागि प्रमुख विकल्प बनिरहेको देखाएको छ ।
विभागको तथ्यांकअनुसार, असोजमा श्रम स्वीकृति लिनेमा ६३ हजार ३७७ पुरुष र १० हजार ३८८ महिला छन्। कुल श्रम स्वीकृति लिनेमा पुरुषको हिस्सा ८५.९ प्रतिशत र महिलाको हिस्सा १४.१ प्रतिशत रहेको छ ।
वैदेशिक रोजगारीमा जानेमध्ये पहिलोपटक श्रम स्वीकृति लिनेको संख्या ४३ हजार ५५९ रहेको छ । त्यस्तै, यसअघि वैदेशिक रोजगारीमा गएर पुनः फर्किन चाहने ३० हजार २०६ जनाले पुनः श्रम स्वीकृति लिएका छन् । यसले नयाँ श्रमिकसँगै विदेशमा कामको अनुभव भएका नेपाली पनि पुनः वैदेशिक रोजगारीमै फर्किने क्रम उल्लेख्य रहेको देखाउँछ ।
नेपाली श्रमिकको प्रमुख गन्तव्यमा खाडी मुलुकको वर्चस्व कायमै छ । असोजमा १०६ भन्दा बढी देशका लागि श्रम स्वीकृति जारी भएकामा सबैभन्दा धेरै संयुक्त अरब इमिरेट्स (यूएई) का लागि २३ हजार ८९९ जनाले स्वीकृति लिएका छन् । यो कुल संख्याको करिब ३२.४ प्रतिशत हो ।
यूएईपछि कतारका लागि ११ हजार ४९७, मलेसियाका लागि ९ हजार ६५३, साउदी अरेबियाका लागि ८ हजार ३६६ र कुवेतका लागि ५ हजार २७ जनाले श्रम स्वीकृति लिएका छन् । युरोपेली गन्तव्यतर्फ रोमानिया प्रमुख देखिएको छ । रोमानियाका लागि २ हजार ४७८, जापानका लागि १ हजार ४९५, टर्कीका लागि १ हजार १०३, दक्षिण कोरियाका लागि १ हजार ४१ र ओमनका लागि १ हजार ३१ जनाले श्रम स्वीकृति लिएका छन् ।
महिला श्रमिकको उपस्थिति साइप्रसमा पनि उल्लेख्य छ । उक्त महिनामा साइप्रस जाने ९४५ जनामध्ये ७४९ जना महिला रहेका छन् । यसले केही गन्तव्यमा महिला श्रमिकको सहभागिता तुलनात्मक रूपमा उच्च रहेको देखाउँछ ।
जिल्लागत विवरणअनुसार झापाबाट सबैभन्दा धेरै ३ हजार ४९० जनाले श्रम स्वीकृति लिएका छन् । समग्र तथ्यांकले मधेस तथा पूर्वी नेपालका जिल्लाबाट वैदेशिक रोजगारीमा जानेको चाप उच्च रहेको संकेत गर्छ ।
सीपगत विवरणमा ४० हजार ७०० जना दक्ष श्रमिक छन्, जुन कुल संख्याको ५५.१७ प्रतिशत हो । त्यस्तै, २० हजार २२८ जना अदक्ष, १२ हजार ३४२ जना अर्धदक्ष, ४१५ जना व्यावसायिक र ८० जना उच्च दक्ष श्रमिकले श्रम स्वीकृति लिएका छन् ।
दक्ष श्रमिकको संख्या बढी देखिए पनि अदक्ष श्रमिकको ठूलो उपस्थिति चुनौतीका रूपमा रहेको छ । स्वदेशमै रोजगारीका अवसर विस्तार, सीप विकास र उत्पादनमूलक क्षेत्रमा लगानी बढाउन नसके वैदेशिक रोजगारीप्रतिको निर्भरता कायमै रहने देखिन्छ ।
