वैशाख १९, काठमाडौं ।
डेढ महिनाको अवधिमा अनुचित व्यापारिक कारोवार गरेको भन्दै वाणिज्य, आपूर्ति तथा उपभोक्ता संरक्षण विभागले ७० फर्मलाई जरिवाना गरेको छ । मूल्य वृद्धि गर्ने, गुणस्तरहीन सामग्री उत्पादन एवं बिक्रीवितरण गर्ने, मूल्यसूची नराख्नेलगायत उपभोक्ताको गुनासोका आधारमा विभागले अनुगमन र कारवाही गरेको हो । सरकराले चैत १ गतेदेखि यही वैशाख १८ गतेसम्म विभागले गरेको नियमित बजार अनुगमनका क्रममा सबैभन्दा धेरै कारवाहीमा पर्नेमा खाद्य पसलहरु रहेका छन् ।
२४५ फर्मको अनुगमन गर्दा १०९ फर्म सामान्य अवस्थामा रहेको, ६० फर्मलाई सामान्य कैफियतमा तत्काल नै सुधार गराइएको तथा सुधार गर्न निर्देशन दिइएको, ७० फर्मलाई जरिवाना गरिएको, दुई फर्मबाट परीक्षणका लागि वस्तुको नमूना लिइएको र चार फर्मलाई आवश्यक कागजात वा स्पष्टीकरण पेश गर्न भनिएको छ ।
विभागका सूचना अधिकारी रवीन्द्र आचार्यका अनुसार बजार अनुगमनका क्रममा जरिवाना गरिएका फर्ममध्ये २३ खाद्यान्न पसल छन् । विभागका अनुसार कारवाहीस्वरुप जरिवाना गरिएका फर्ममध्ये नौ सर्जिकल हाउसबाट १७ लाख ४० हजार रुपैयाँ, २३ खाद्य पसलबाट १४ लाख २५ हजार रुपैयाँ, पाँच औषधि पसलबाट पाँच लाख ५० हजार रुपैयाँ, ६ खाद्यान्न र ग्यास पसलबाट चार लाख ५५ हजार रुपैयाँ, पाँच ग्यास पसलबाट ५५ हजार रुपैयाँ, ६ मासु पसलबाट सात लाख रुपैयाँ, पाँच शृङ्गार पसलबाट चार लाख १५ हजार रुपैयाँ, दुई मार्टबाट सात लाख रुपैयाँ र अन्य पसलबाट ७० लाख ६५ हजार रुपैयाँ राजश्व संकलन गरिएको छ
