पूर्वाधार विकास परियोजनामा वित्तीय लगानी गर्दै आएको नेपाल इन्फ्रास्ट्रक्चर बैंक (निफ्रा) ले गत आर्थिक वर्षमा कर्जा विस्तारलाई उल्लेखनीय रूपमा बढाए पनि नाफामा भने गिरावट आएको छ। बढ्दो ब्याज खर्च, खुद ब्याज आम्दानीमा आएको संकुचन तथा वित्तीय लागत बढेकाले बैंकको समग्र वित्तीय प्रदर्शन प्रभावित भएको हो। यद्यपि, कर्जा विस्तार, शून्य निष्क्रिय कर्जा (एनपीएल) र पूर्वाधार क्षेत्रमा बढ्दो लगानीले बैंकको दीर्घकालीन सम्भावना भने सकारात्मक रहेको संकेत देखिएको छ।
बैंकले सार्वजनिक गरेको आर्थिक वर्ष २०८२/८३ को चौथो त्रैमासिक वित्तीय विवरणअनुसार समीक्षा अवधिमा ९८ करोड ७३ लाख रुपैयाँ खुद नाफा आर्जन गरेको छ। अघिल्लो आर्थिक वर्षको सोही अवधिमा बैंकले १ अर्ब २३ करोड ४० लाख रुपैयाँ नाफा कमाएको थियो। यस आधारमा बैंकको नाफा १९.९८ प्रतिशत ले घटेको देखिन्छ।
नाफा घट्नुको मुख्य कारण खुद ब्याज आम्दानीमा आएको कमी हो। अघिल्लो वर्ष १ अर्ब ९० करोड रुपैयाँ रहेको खुद ब्याज आम्दानी समीक्षा अवधिमा २३.८९ प्रतिशत ले घटेर १ अर्ब ४४ करोड रुपैयाँ मा सीमित भएको छ। निक्षेप तथा ऋण उपकरणको लागत बढेसँगै बैंकको ब्याज खर्च पनि उल्लेखनीय रूपमा बढेको छ। अघिल्लो वर्ष ५६ करोड ९१ लाख रुपैयाँ रहेको ब्याज खर्च बढेर ९७ करोड ७३ लाख रुपैयाँ पुगेको छ, जसले नाफामा प्रत्यक्ष दबाब सिर्जना गरेको हो।
यद्यपि, बैंकले २१ करोड २७ लाख रुपैयाँ बराबरको इम्पेयरमेन्ट चार्ज रिभर्स गर्न सफल भएकाले नाफामा अझ ठूलो गिरावट आउनबाट जोगिएको छ। यसले बैंकको सम्पत्ति गुणस्तर सुदृढ रहेको संकेत पनि दिएको छ।
व्यावसायिक विस्तारतर्फ भने निफ्राले उल्लेखनीय प्रगति गरेको छ। ग्राहक तथा पूर्वाधार आयोजनामा प्रवाह गरिएको कर्जा २४ अर्ब ९४ करोड रुपैयाँबाट बढेर ३१ अर्ब ४२ करोड रुपैयाँ पुगेको छ। बैंकले हालसम्म ५६ अर्ब १३ करोड रुपैयाँ बराबरको कर्जा स्वीकृत गरिसकेको जनाएको छ। ती आयोजना निर्माणको प्रगतिअनुसार स्वीकृत रकम चरणबद्ध रूपमा निकासा हुँदै जाने बैंकको भनाइ छ। यसले ऊर्जा, सडक, जलस्रोत, औद्योगिक तथा अन्य पूर्वाधार परियोजनामा बैंकको लगानी विस्तार भइरहेको देखाउँछ।
निक्षेप संकलनमा पनि सामान्य वृद्धि देखिएको छ। अघिल्लो वर्ष ७ अर्ब ६८ करोड रुपैयाँ रहेको निक्षेप बढेर ७ अर्ब ८३ करोड रुपैयाँ पुगेको छ। समीक्षा अवधिसम्म बैंकको कुल सम्पत्ति ४१ अर्ब ८४ करोड रुपैयाँ पुगेको छ।
बैंकको सबैभन्दा उल्लेखनीय उपलब्धि भने कर्जा गुणस्तर हो। समीक्षा अवधिको अन्त्यसम्म पनि बैंकको निष्क्रिय कर्जा (एनपीएल) शून्य प्रतिशत कायम रहेको छ। बैंकिङ क्षेत्रमा बढ्दो खराब कर्जाको चुनौतीबीच निफ्राको यो उपलब्धिलाई सकारात्मक संकेतका रूपमा हेरिएको छ।
वित्तीय सूचकहरूमा पनि केही सुधार देखिएको छ। बैंकको कस्ट अफ फन्ड्स ६.५१ प्रतिशतबाट घटेर ६.४६ प्रतिशत मा झरेको छ भने बेस रेट ६.९७ प्रतिशतबाट घटेर ६.७७ प्रतिशत कायम भएको छ। पछिल्लो तीन महिनाको औसत बेस रेट ६.७६ प्रतिशत रहेको बैंकले जनाएको छ। यस्तै, सीडी रेसियो ७९.९२ प्रतिशत पुगेको छ, जसले उपलब्ध स्रोतको प्रभावकारी परिचालन भइरहेको संकेत गर्छ।
