संयुक्त अधिराज्य (बेलायत) की इण्डो–प्यासिफिक राज्यमन्त्री सीमा मल्होत्रा ले नेपाल र बेलायतबीचको ऐतिहासिक सम्बन्धलाई आधुनिक आवश्यकता अनुसार सुदृढ बनाउने प्रतिबद्धता व्यक्त गरेकी छन्। आफ्नो पहिलो नेपाल भ्रमणका क्रममा राजधानीमा आयोजित एक कार्यक्रममा बोल्दै उनले शिक्षा, सीप विकास र आर्थिक सहकार्यलाई द्विपक्षीय सम्बन्धको मुख्य आधारका रूपमा अघि बढाउनुपर्ने धारणा राखिन्।
नेपाल र बेलायतबीच करिब दुई सय वर्ष पुरानो मित्रता रहेको उल्लेख गर्दै मन्त्री मल्होत्राले करिब एक शताब्दीअघि सम्पन्न मैत्री सन्धिलाई नयाँ सन्दर्भमा पुनः सशक्त बनाउनुपर्नेमा जोड दिइन्। उनले बेलायतले विगत सात दशकदेखि नेपालको शिक्षा क्षेत्रमा निरन्तर सहयोग गर्दै आएको स्मरण गराउँदै आगामी दिनमा पनि सहकार्यलाई अझ विस्तार गरिने स्पष्ट पारिन्।
उनले शिक्षा र आर्थिक विकासबीचको सम्बन्ध अत्यन्तै गहिरो रहेको बताइन्। नेपाल सरकारले अघि सारेको आर्थिक वृद्धि र रोजगारी सिर्जनाको लक्ष्य हासिल गर्न आवश्यक सीप र दक्ष जनशक्ति विकासमा बेलायत सहकार्य गर्न तयार रहेको उनको भनाइ थियो। यसका लागि बेलायतमा लागू गरिएको औद्योगिक रणनीति तथा ‘स्किल्स इङ्गल्याण्ड’ जस्ता कार्यक्रमहरूको अनुभव नेपालसँग साझा गर्न सकिने उनले उल्लेख गरिन्।
मन्त्री मल्होत्राले ‘ट्रान्सनेशनल एजुकेसन’ को अवधारणालाई विशेष महत्व दिँदै नेपाली विद्यार्थीहरूले आफ्नै देशमा बसेर बेलायती विश्वविद्यालयको शैक्षिक योग्यता हासिल गर्न सक्ने अवसर विस्तार गर्नुपर्ने बताइन्। उनका अनुसार यसले विदेशिने विद्यार्थीहरूको संख्या घटाउने, खर्च कम गर्ने र देशभित्रै दक्ष जनशक्ति उत्पादन गर्न सहयोग पुर्याउनेछ।
हाल नेपालका करिब ३० वटा क्याम्पससँग १९ वटा बेलायती विश्वविद्यालयहरूको सहकार्य रहेको र यसबाट १७ हजारभन्दा बढी नेपाली विद्यार्थी लाभान्वित भइरहेको उनले जानकारी दिइन्। उनले बेलायतमा बसोबास गर्ने नेपाली समुदायलाई दुई देशबीचको ‘जीवित पुल’ का रूपमा चित्रण गर्दै उनीहरूको योगदानको प्रशंसा गरिन्।
बेलायतमा नेपाली मूलका व्यक्तिहरू राजनीति, व्यवसाय तथा विभिन्न पेशागत क्षेत्रमा सफल बन्दै गएकोमा खुशी व्यक्त गर्दै उनले बेलायतमा अध्ययन गर्न जाने नेपाली विद्यार्थी छैटौँ ठूलो अन्तर्राष्ट्रिय समूहका रूपमा रहेको उल्लेख गरिन्। यसलाई उनले दुई देशबीचको शैक्षिक सम्बन्धको सकारात्मक संकेतका रूपमा लिएकी छन्।
उनले भनिन् कि कुनै पनि देशले मानवीय पूँजीमा लगानी नगरी दिगो विकास हासिल गर्न सक्दैन। विद्यालय शिक्षा, शिक्षक तालिम र व्यावसायिक सीप विकासमा नेपाल र बेलायतबीचको सहकार्यले दीर्घकालीन रूपमा आर्थिक समृद्धिमा योगदान पुर्याउने विश्वास उनले व्यक्त गरिन्।
भ्रमणका क्रममा मन्त्री मल्होत्राले नेपाल सरकारका शिक्षा, परराष्ट्र तथा अर्थ मन्त्रालयका उच्च पदाधिकारीहरूसँग छुट्टाछुट्टै भेटवार्ता गरेकी थिइन्। ती भेटहरूमा आधारभूत शिक्षा सुधार, बालिका शिक्षा प्रवर्द्धन तथा अटिजम भएका बालबालिकाका लागि विशेष शैक्षिक कार्यक्रमहरूमा सहकार्य गर्ने विषयमा छलफल भएको बताइएको छ।
