देशको समकालीन राजनीतिमा नयाँ मोड ल्याउने दाबी गर्दै राष्ट्र, राष्ट्रियता, धर्म, संस्कृति र नागरिक बचाउ अभियानका संयोजक दुर्गा प्रसाईंले राष्ट्रिय प्रजातन्त्र पार्टी (राप्रपा) तथा आफ्नो अभियान दुवै विसर्जन भएको घोषणा गरेका छन्। राप्रपाका निवर्तमान महामन्त्री डा. धवलशमशेर जबराको समूहसँग एकता भएपछि उनले यस्तो घोषणा गरेका हुन्।
प्रसाईंले शुक्रबार आयोजित कार्यक्रममा बोल्दै अब नयाँ राजनीतिक संरचना निर्माण भइसकेको र त्यसले नै राजतन्त्र, राष्ट्रियता, धर्म तथा नागरिक बचाउका मुद्दाहरूलाई अगाडि बढाउने बताए। “आजदेखि राप्रपा विसर्जन भएको छ, नागरिक बचाउ अभियान पनि समाप्त भएको छ,” उनले भने, “अब हामी नयाँ ढाँचामा संगठित भएका छौं र यही पार्टीले सबै मुद्दाहरू बोक्नेछ।”
उनको यो अभिव्यक्तिले परम्परागत राजनीतिक संरचना पुनर्गठनको संकेत गरेको छ। विशेषगरी राजतन्त्र पुनस्र्थापना, हिन्दु राष्ट्रको पक्षधरता र राष्ट्रिय स्वाभिमानका विषयलाई केन्द्रमा राखेर नयाँ शक्ति निर्माण गर्ने रणनीति स्पष्ट देखिएको विश्लेषण गरिएको छ।
प्रसाईंले वर्तमान राजनीतिक नेतृत्वप्रति असन्तुष्टि जनाउँदै प्रमुख तीन शीर्ष नेताहरू — केपी शर्मा ओली, शेरबहादुर देउवा र प्रचण्ड — बाहेक सबै राष्ट्रवादी शक्तिहरूलाई आफ्नो नयाँ अभियानमा आबद्ध हुन खुला आह्वान गरेका छन्। “देश र राष्ट्रियताको पक्षमा उभिएका सबै शक्ति अब एक ठाउँमा आउनुपर्छ,” उनले जोड दिए।
डा. धवलशमशेर जबराको समूहसँगको एकताले राप्रपाभित्रको आन्तरिक समीकरणमा समेत ठूलो परिवर्तन ल्याउने अनुमान गरिएको छ। यद्यपि, राप्रपाका अन्य धारहरूले यस घोषणालाई कसरी लिन्छन् भन्ने अझ स्पष्ट भइसकेको छैन। पार्टीभित्रको आधिकारिक धारणा सार्वजनिक हुन बाँकी रहेको छ।
राजनीतिक विश्लेषकहरूका अनुसार प्रसाईंको यो कदमले राष्ट्रवादी एजेन्डा बोकेका विभिन्न साना समूहहरूलाई एकीकृत गर्ने प्रयासका रूपमा लिन सकिन्छ। तर, औपचारिक रूपमा राप्रपा विसर्जन भएको दाबी कानुनी तथा संगठनात्मक रूपमा कत्तिको वैध छ भन्ने प्रश्न पनि उठ्न थालेको छ।
यसबीच, प्रसाईंले आगामी दिनमा नयाँ पार्टीको औपचारिक संरचना, नेतृत्व र कार्यदिशा सार्वजनिक गर्ने संकेत गरेका छन्। उनका अनुसार देशको वर्तमान राजनीतिक अवस्था परिवर्तन गर्न वैकल्पिक शक्ति निर्माण अपरिहार्य भइसकेको छ।
