फिफा विश्वकप २०२६ मा जर्मनीले आफ्नो अभियान प्रभावशाली ढंगले सुरु गरेको छ। समूह ‘ई’ अन्तर्गत आइतबार राति अमेरिकाको ह्युस्टनस्थित एनआरजी स्टेडियममा सम्पन्न खेलमा जर्मनीले विश्वकपमा पहिलो पटक सहभागी भएको कुरासाओलाई ७–१ को फराकिलो अन्तरले पराजित गरेको हो।
खेलको सुरुआतदेखि नै जर्मनीले मैदानमा पूर्ण नियन्त्रण कायम राखेको थियो। छैटौं मिनेटमै फेलिक्स नेमेचाले गोल गर्दै टोलीलाई अग्रता दिलाए। यो गोल प्रतियोगिताको हालसम्मकै सबैभन्दा छिटो गोलका रूपमा पनि दर्ज भएको छ। प्रारम्भिक अग्रतापछि जर्मनीले आक्रमणको तीव्रता झन् बढाउँदै विपक्षी टोलीमाथि लगातार दबाब सिर्जना गरिरह्यो।
कुरासाओले भने २१औं मिनेटमा खेलमा क्षणिक रूपमा आशा जगाएको थियो। लिभानो कोमेनेन्सियाले गरेको गोलसँगै खेल १–१ को बराबरीमा पुगेको थियो। उक्त गोल कुरासाओको विश्वकप इतिहासकै पहिलो गोल बनेर अभिलेखमा दर्ज भयो। तर त्यसपछि जर्मनीले कुनै अवसर नदिई लगातार गोल गर्दै खेललाई पूर्ण रूपमा आफ्नो पक्षमा मोड्यो।
जर्मनीका लागि निको स्लोटरबेक, जमाल मुसियाला, नाथानियल ब्राउन र डेनिज उन्डाभले समान एक–एक गोल गरे। आर्सनलका फरवार्ड काई हाभर्ट्ज भने टोलीका सर्वाधिक चम्किला खेलाडी बने। उनले दुई गोल गर्दै जर्मनीको जितलाई थप आकर्षक बनाए। उत्कृष्ट प्रदर्शनका कारण हाभर्ट्ज ‘प्लेयर अफ द म्याच’ घोषित भए।
यो जितसँगै जर्मनीले समूह ‘ई’ मा महत्वपूर्ण तीन अंक जोड्दै उपाधि दाबेदार टोलीका रूपमा आफ्नो दाबेदारी प्रस्तुत गरेको छ। टोलीको आक्रमण र समन्वयले समर्थकहरूलाई उत्साहित बनाएको छ।
उता, भारी हार व्यहोरे पनि कुरासाओले विश्वकपमा आफ्नो पहिलो गोल गर्न सफल भएको उपलब्धिलाई सकारात्मक रूपमा लिएको छ। अब जर्मनीले आफ्नो दोस्रो खेलमा आइभोरी कोस्टसँग प्रतिस्पर्धा गर्नेछ भने कुरासाओले इक्वेडरविरुद्ध पहिलो अंकको खोजी गर्नेछ। आगामी खेलहरूले दुवै टोलीको यात्रा कता मोडिनेछ भन्ने निर्धारण गर्नेछन्।
