संघीय संसदअन्तर्गत प्रतिनिधिसभा र राष्ट्रियसभाको बैठक आज बस्दै छ। आर्थिक वर्ष २०८३/८४ को बजेटमाथि छलफललाई अघि बढाउने उद्देश्यसहित दुवै सदनको बैठक आह्वान गरिएको हो। संसद सचिवालयका अनुसार प्रतिनिधिसभाको बैठक बिहान ११ बजे र राष्ट्रियसभाको बैठक दिउँसो १ः१५ बजे सुरु हुनेछ।
प्रतिनिधिसभामा आजबाट विनियोजन विधेयक, २०८३ माथिको विस्तृत छलफल प्रारम्भ हुने भएको छ। विभिन्न मन्त्रालयका लागि प्रस्तावित बजेट तथा कार्यक्रमबारे सांसदहरूले धारणा राख्नेछन् भने सम्बन्धित मन्त्रालयका खर्च शीर्षकहरूबारे समीक्षा र बहस गरिनेछ।
आजको कार्यसूचीअनुसार युवा तथा रोजगार, उद्योग, वाणिज्य तथा आपूर्ति, कृषि, वन तथा वातावरण, सञ्चार तथा सूचना प्रविधि, संस्कृति, पर्यटन तथा नागरिक उड्डयन, शिक्षा तथा खेलकुदलगायत मन्त्रालयका विनियोजन शीर्षकमाथि छलफल हुने तय भएको छ। त्यसैगरी भूमि व्यवस्था, सहकारी तथा गरिबी निवारण, संघीय मामिला तथा सामान्य प्रशासन, साथै महिला, बालबालिका, लैङ्गिक तथा यौनिक अल्पसङ्ख्यक तथा सामाजिक सुरक्षा मन्त्रालयसम्बन्धी बजेट प्रस्ताव पनि छलफलका लागि प्रस्तुत गरिनेछ।
यसैबीच, राष्ट्रियसभामा आगामी आर्थिक वर्षको राजस्व र व्ययसम्बन्धी वार्षिक अनुमानमाथि सामान्य छलफल जारी रहनेछ। सांसदहरूले बजेटका प्राथमिकता, स्रोत व्यवस्थापन तथा खर्चको प्रभावकारिताका विषयमा आफ्ना धारणा प्रस्तुत गर्ने अपेक्षा गरिएको छ।
बैठकमा अर्थमन्त्री डा. स्वर्णिम वाग्लेले बजेटमाथि उठेका जिज्ञासा र प्रश्नहरूको जवाफ दिने कार्यक्रम रहेको संसद सचिवालयले जनाएको छ। उनले सरकारको आर्थिक नीति, बजेट कार्यान्वयनको रणनीति तथा विकास प्राथमिकताबारे पनि स्पष्ट पार्ने अपेक्षा गरिएको छ।
सरकारले प्रस्तुत गरेको बजेटमाथि संसदमा हुने छलफललाई आगामी आर्थिक वर्षका कार्यक्रम र योजनाको दिशा निर्धारण गर्ने महत्वपूर्ण प्रक्रियाका रूपमा हेरिएको छ। दुवै सदनमा हुने आजको बहसले बजेटका विभिन्न पक्षबारे थप स्पष्टता ल्याउने विश्वास गरिएको छ।
