नेपाल आयल निगमले देशभर पुनः १४.२ केजी क्षमताका घरेलु एलपी ग्यास सिलिण्डर नियमित रूपमा भर्ने तथा बिक्री–वितरण गर्ने व्यवस्था लागू गरेको जनाएको छ। निगमले बुधबार जारी गरेको प्रेस विज्ञप्तिमार्फत भारतबाट ग्यास आपूर्तिको अवस्था सहज बन्दै गएको र बजारमा उपभोक्ताको मागलाई ध्यानमा राख्दै पुरानै क्षमताको सिलिण्डर उपलब्ध गराउने निर्णय गरिएको जानकारी दिएको हो।
निगमका अनुसार भारतीय आपूर्तिकर्ता इण्डियन आयल कर्पोरेसनअन्तर्गत रहेका विभिन्न रिफाइनरी तथा बोटलिङ प्लान्टबाट नेपालतर्फ हुने ग्यास लोडिङमा पछिल्ला दिनमा सुधार आएको छ। आपूर्ति प्रणाली क्रमशः सामान्य बन्दै गएपछि बजारमा पर्याप्त ग्यास उपलब्ध गराउने उद्देश्यले १४.२ केजी क्षमताका सिलिण्डर पुनः वितरण गर्ने निर्णय गरिएको हो।
केही समयअघि आपूर्तिमा आएको असहज अवस्थाका कारण बजारमा ग्यासको अभाव देखिएको थियो। त्यसबेला सीमित परिमाणमा उपलब्ध ग्यास धेरै उपभोक्तासम्म पुर्याउने उद्देश्यले निगमले अस्थायी रूपमा ७.१ केजी क्षमताका सिलिण्डर भर्ने व्यवस्था लागू गरेको थियो। उक्त व्यवस्था पूर्ण रूपमा अस्थायी प्रकृतिको रहेको र आपूर्ति सहज भएपछि पुरानै प्रणालीमा फर्किने निगमले त्यसबेला नै स्पष्ट पारेको थियो।
हाल भारतीय पक्षबाट ग्यास ढुवानी र लोडिङ नियमित हुँदै गएको तथा बजारमा मागअनुसार आपूर्ति गर्ने अवस्था सिर्जना भएकाले देशभरका डिलरमार्फत १४.२ केजी ग्यास सिलिण्डर उपलब्ध गराइने निगमले जनाएको छ। यससँगै उपभोक्ताले अब पुनः पहिलेझैँ पूर्ण क्षमताको घरेलु ग्यास सिलिण्डर खरिद गर्न सक्ने भएका छन्।
निगमले १४.२ केजी क्षमताको एलपी ग्यास सिलिण्डरको उपभोक्ता बिक्री मूल्य २ हजार ६० रुपैयाँ कायम गरिएको पनि स्पष्ट गरेको छ। मूल्यमा कुनै परिवर्तन नगरिएको जनाउँदै निगमले स्वीकृत दरअनुसार मात्रै बिक्री गर्न सबै डिलर तथा विक्रेतालाई निर्देशन दिएको छ। साथै तोकिएको मूल्यभन्दा बढी रकम असुल्न नपाइने चेतावनीसमेत दिइएको छ।
निगमले ग्यासको उपलब्धता सामान्य बन्दै गए पनि आवश्यकताभन्दा बढी खरिद गरेर कृत्रिम अभाव सिर्जना नगर्न सर्वसाधारणलाई आग्रह गरेको छ। माग र आपूर्तिबीच सन्तुलन कायम राख्न उपभोक्ताले संयमता अपनाउनु आवश्यक रहेको निगमको भनाइ छ। पर्याप्त परिमाणमा ग्यास बजारमा पठाउने व्यवस्था मिलाइएकाले अनावश्यक रूपमा भण्डारण नगर्न पनि आग्रह गरिएको छ।
यस निर्णयबाट विशेषगरी घरेलु उपभोक्ता, होटल तथा साना व्यवसाय सञ्चालन गर्नेहरूलाई राहत पुग्ने अपेक्षा गरिएको छ। पछिल्ला केही सातायता सानो क्षमताको सिलिण्डर प्रयोग गर्न बाध्य भएका उपभोक्ताले अब पुनः नियमित क्षमताको ग्यास सहज रूपमा प्राप्त गर्ने विश्वास गरिएको छ।
नेपाल आयल निगमले आगामी दिनमा पनि भारतबाट हुने आपूर्तिको अवस्थालाई निरन्तर अनुगमन गर्दै बजारमा ग्यासको सहज उपलब्धता कायम राख्ने जनाएको छ। कुनै पनि क्षेत्रमा कृत्रिम अभाव, कालोबजारी वा मूल्यमा अनियमितता देखिएमा सम्बन्धित निकायलाई जानकारी गराउन उपभोक्तासँग अनुरोध गर्दै निगमले बजार अनुगमनलाई समेत थप प्रभावकारी बनाइने उल्लेख गरेको छ।
