प्रधानमन्त्री वालेन्द्र शाहले मधेश प्रदेशका विभिन्न राजनीतिक दलका शीर्ष नेतासँग शुक्रबार प्रधानमन्त्री तथा मन्त्रिपरिषद्को कार्यालयमा विशेष छलफल गर्नुभएको छ। पछिल्लो समय सुनसरीलगायत तराई–मधेशका केही जिल्लामा देखिएको तनाव, सामाजिक सद्भाव र शान्ति सुरक्षाको अवस्थाबारे छलफल गर्न प्रधानमन्त्रीले मधेशबाट प्रतिनिधित्व गर्ने नेताहरूलाई आमन्त्रण गर्नुभएको हो। छलफलपछि सहभागी नेताहरूले बैठक सकारात्मक, परिणाममुखी तथा विश्वास निर्माण गर्ने दिशामा महत्वपूर्ण भएको प्रतिक्रिया दिएका छन्।
प्रधानमन्त्री शाहले मधेशमा पछिल्ला दिनमा देखिएका घटनाप्रति सरकार गम्भीर रहेको उल्लेख गर्दै यस्ता गतिविधि दोहोरिन नदिन आवश्यक कदमबारे नेताहरूको सुझाव माग्नुभएको थियो। उहाँले शान्ति, सामाजिक सद्भाव र कानुनी शासन कायम राख्दै सबै समुदायबीच आपसी विश्वास अभिवृद्धि गर्न सरकार प्रतिबद्ध रहेको धारणा व्यक्त गर्नुभएको जनाइएको छ।
बैठकमा सहभागी नेताहरूले मधेशका विभिन्न जिल्लामा देखिएका समस्याका कारण, त्यसको समाधानका उपाय तथा दीर्घकालीन रूपमा शान्ति कायम राख्न आवश्यक नीतिगत सुधारबारे आफ्ना धारणा राखेका थिए। उनीहरूले स्थानीय समुदायको भावना सम्बोधन गर्दै संवाद, सहकार्य र विकासलाई प्राथमिकतामा राख्नुपर्ने सुझाव दिएका छन्। प्रधानमन्त्रीले नेताहरूका सुझावलाई गम्भीरतापूर्वक सुनेको र आवश्यक पहल गर्ने प्रतिबद्धता व्यक्त गरेको सहभागीहरूले बताएका छन्।
छलफलपछि सञ्चारकर्मीसँग कुरा गर्दै जनमत पार्टीका अध्यक्ष डा. सिके राउतले प्रधानमन्त्री शाहले पहिलो पटक मधेश केन्द्रित राजनीतिक दलका नेताहरूसँग औपचारिक रूपमा संवाद गरेको उल्लेख गर्दै यसलाई सकारात्मक सुरुआतका रूपमा व्याख्या गर्नुभयो। उहाँका अनुसार मधेशमा देखिएका पछिल्ला समस्या समाधानका लागि सरकारले स्थानीय तह, सुरक्षा निकाय र राजनीतिक दलबीच प्रभावकारी समन्वय गर्नुपर्ने सुझाव दिइएको छ।
त्यसैगरी, नेता राजेन्द्र महतोले विगतमा मधेशसँग भएका विभिन्न राजनीतिक सहमति तथा सम्झौताहरू कार्यान्वयन गर्न सरकारलाई ध्यानाकर्षण गराइएको जानकारी दिनुभयो। उहाँले मधेशका जनताका जायज माग सम्बोधन गर्न र विकासका कार्यक्रमलाई प्रभावकारी रूपमा अघि बढाउन सरकार थप सक्रिय हुनुपर्ने धारणा राख्नुभयो। सुनसरीमा भएको घटनाको निष्पक्ष छानबिन गरी दोषीलाई कानुनी दायरामा ल्याउन तथा समयमै समस्या समाधान गर्न पनि प्रधानमन्त्रीसँग आग्रह गरिएको उहाँले बताउनुभयो।
छलफलमा महन्थ ठाकुर, डा. सिके राउत, राजेन्द्र महतो, लालबाबु राउत, समिम मियाँ अन्सारी, राम के. शर्मा, प्रभु शाह, अमरेश कुमार सिंह, शरतसिंह भण्डारी, जयकान्त राउतलगायत मधेशका विभिन्न राजनीतिक दलका नेताहरूको सहभागिता रहेको थियो।
सरकारले मधेशका राजनीतिक नेतृत्वसँग प्रत्यक्ष संवाद सुरु गरेको यो पहलले आपसी विश्वास बढाउने, क्षेत्रीय समस्याको समाधान खोज्ने तथा दीर्घकालीन रूपमा शान्ति, सद्भाव र राजनीतिक स्थायित्व कायम गर्न सहयोग पुग्ने अपेक्षा गरिएको छ। सहभागी नेताहरूले पनि संवादलाई निरन्तरता दिनुपर्नेमा जोड दिँदै सरकार र राजनीतिक दलबीच सहकार्य अझ सुदृढ बनाउनुपर्ने आवश्यकता औंल्याएका छन्।
