सुनसरीको देवानगञ्जमा भएको घटनापछि मधेशका विभिन्न जिल्लामा आन्दोलन र तनावको अवस्था जारी रहँदा गृहमन्त्री सुधन गुरुङले हिन्दु सम्राट सेनाका प्रतिनिधिलाई आन्दोलन स्थगित गरी वार्ता र संवादमार्फत समस्या समाधान गर्न आह्वान गरेका छन्। सुनसरीबाट सुरु भएको विरोध प्रदर्शन क्रमशः हिंसात्मक झडपमा परिणत भएपछि सरकारले संवादमार्फत समाधान खोज्ने पहल अघि बढाएको हो।
देवानगञ्ज घटनापछि सिरहा, धनुषा, सर्लाही र पर्सालगायत जिल्लामा पनि दुई समूहबीच झडप भएको जनाइएको छ। त्यसपछि गृहमन्त्री गुरुङ स्वयं सुनसरी पुगेर सुरक्षा अवस्थाको अनुगमन गर्नुका साथै आन्दोलनरत पक्षसँग वार्ताको वातावरण बनाउन प्रयास थालेका हुन्। सरकारको तर्फबाट आन्दोलन रोक्न र वार्तामार्फत निकास खोज्न हिन्दु सम्राट सेनाका प्रतिनिधिसँग प्रत्यक्ष सम्पर्क गरिएको बताइएको छ।
हिन्दु सम्राट सेनाका एक प्रमुख प्रतिनिधिले गृहमन्त्रीबाट वार्ताका लागि सन्देश आएको पुष्टि गरेका छन्। उनका अनुसार गृहमन्त्रीले तत्काल सुनसरी आएर छलफल गर्न आग्रह गरेका थिए। तर, रातारात सुनसरी पुग्न सम्भव नभएको जानकारी गराउँदै उनीहरूले पहिलो चरणको संवाद जनकपुरमै हुनुपर्ने अडान राखेका छन्। त्यसपछि आवश्यक परे सुनसरीमा थप छलफल गर्न सकिने उनीहरूको धारणा रहेको छ।
सोही प्रतिनिधिले आन्दोलनकारीलाई राज्यले एकपक्षीय रूपमा दोषी देखाउन खोजेको आरोप पनि लगाएका छन्। उनका अनुसार आफूहरूले धार्मिक आस्था र विश्वासमाथि भएको हस्तक्षेपको विरोधस्वरूप शान्तिपूर्ण आन्दोलन सुरु गरेका हुन्। प्रहरीको गोलीबाट आफ्ना समर्थकको ज्यान गएको दाबी गर्दै दोष आफूहरूमाथि मात्रै थोपर्न खोजिएको भन्दै उनले आपत्ति जनाएका छन्। आन्दोलनमा सहभागीहरू स्वतःस्फूर्त रूपमा सडकमा आएको र अराजक अवस्था राज्य पक्षकै कारण सिर्जना भएको उनको आरोप छ।
उता, देवानगञ्ज क्षेत्रमा हिन्दु सम्राट सेनाको पछिल्लो गतिविधिले स्थानीय प्रशासन, सुरक्षा निकाय र राजनीतिक वृत्तमा चासो बढाएको छ। धार्मिक तथा सामाजिक अभियानको नाममा विभिन्न कार्यक्रम सञ्चालन गर्दै आएको समूहका गतिविधिलाई लिएर स्थानीय स्तरमा फरक–फरक धारणा देखिएका छन्। केहीले यसलाई धार्मिक स्वतन्त्रताको अभ्यासका रूपमा हेरेका छन् भने अन्यले सामाजिक सद्भावमा असर पर्न सक्ने चिन्ता व्यक्त गरेका छन्।
स्थानीय प्रशासनले समूहका भेला, प्रचारात्मक कार्यक्रम र धार्मिक नारासहितका गतिविधिमाथि निगरानी बढाएको जनाएको छ। बहुजातीय तथा बहुधार्मिक समुदाय बसोबास गर्ने क्षेत्रमा कुनै पनि प्रकारको तनाव सिर्जना हुन नदिन सुरक्षा व्यवस्था कडा पारिएको छ। गृहमन्त्री गुरुङले पनि नेपाल प्रहरी, सशस्त्र प्रहरी बल तथा स्थानीय प्रशासनलाई संवेदनशील क्षेत्रमा थप सतर्क रहन र कानुनविपरीत गतिविधि हुन नदिन निर्देशन दिएका छन्।
सरकारले सबै पक्षलाई संयमता अपनाउन, अफवाहमा विश्वास नगर्न र सामाजिक सद्भाव कायम राख्न आग्रह गरेको छ। साथै, धार्मिक स्वतन्त्रताको सम्मान गर्दै कानुनको दायराभित्र रहेर आफ्ना गतिविधि सञ्चालन गर्न सबै पक्षलाई अपिल गरिएको छ। सरकार, स्थानीय प्रशासन, राजनीतिक दल, नागरिक समाज र आन्दोलनरत पक्षबीच संवाद र सहकार्यमार्फत मात्रै देवागञ्जसहित मधेशका जिल्लामा देखिएको तनाव समाधान हुन सक्ने अपेक्षा गरिएको छ।
