विश्व बजारमा कच्चा तेलको मूल्य उल्लेखनीय रूपमा घटेको छ भने सुनसहित अन्य बहुमूल्य धातुको मूल्यमा वृद्धि देखिएको छ। अमेरिकी राष्ट्रपति डोनाल्ड ट्रम्पले इरानसँग तत्काल सैन्य कारबाहीभन्दा पनि कूटनीतिक वार्तालाई प्राथमिकता दिने संकेत दिएपछि अन्तर्राष्ट्रिय ऊर्जा बजारमा सकारात्मक प्रभाव परेको हो। यसले तेलको आपूर्ति अवरोध हुने सम्भावना कम भएको आकलन गरिएसँगै तेलको मूल्य पाँच प्रतिशतभन्दा बढीले ओरालो लागेको छ।
ट्रम्पले अमेरिका र इरानबीच सोमबार वार्ता हुने जानकारी सार्वजनिक गरेका छन्। यद्यपि उनले सम्भावित सम्झौताका लागि कुनै निश्चित समयसीमा तोकेका छैनन्। त्यसका बाबजुद पनि दुवै देशबीच संवादको वातावरण बन्ने अपेक्षाले लगानीकर्तामा आशा बढेको छ। यसले पछिल्ला दिनमा चर्किएको भूराजनीतिक तनाव केही मत्थर हुने विश्वास बढाएको छ, जसको प्रत्यक्ष असर तेल बजारमा देखिएको हो।
यता, सुनको मूल्य भने सोमबार बढेको छ। न्यूयोर्क मर्कन्टाइल एक्सचेञ्ज (कोमेक्स) अन्तर्गत स्पट गोल्डको मूल्य ०.४ प्रतिशतले वृद्धि भई प्रतिऔंस ४ हजार ५५ डलर ७६ सेन्ट पुगेको छ। त्यस्तै, अमेरिकी गोल्ड फ्युचर्स पनि ०.९ प्रतिशतले बढेर प्रतिऔंस ४ हजार ५४ डलरमा कारोबार भएको छ। बजार विश्लेषकहरूका अनुसार अमेरिकी डलर कमजोर बन्दा अन्तर्राष्ट्रिय बजारमा सुनको माग बढेको हो।
डलर कमजोर हुनुको प्रमुख कारण जापानले आफ्ना मुद्रा येनलाई मजबुत बनाउन विदेशी विनिमय बजारमा गरेको हस्तक्षेपलाई मानिएको छ। डलरको मूल्य घट्दा अन्य मुद्रा प्रयोग गर्ने लगानीकर्ताका लागि सुन खरिद अपेक्षाकृत सस्तो पर्न जान्छ। यही कारणले सुनको माग बढेको र त्यसको असर मूल्यमा देखिएको विश्लेषण गरिएको छ।
केसीएम ट्रेडका प्रमुख बजार विश्लेषक टिम वाटररका अनुसार सुनले साताको सुरुआत सकारात्मक रूपमा गरेको भए पनि पश्चिम एसियामा कायम रहेको तनाव र तेल बजारको अनिश्चितताले यसको मूल्यवृद्धिलाई सीमित बनाएको छ। उनका अनुसार लगानीकर्ताले अझै पनि भूराजनीतिक घटनाक्रमलाई नजिकबाट नियालिरहेका छन्, जसले आगामी दिनमा सुनको मूल्यमा थप उतारचढाव ल्याउन सक्छ।
विश्लेषकहरूले अमेरिका-इरानबीचको तनाव सुरु भएयता मुद्रास्फीतिको जोखिम पनि बढेको बताएका छन्। युद्ध वा द्वन्द्वका कारण ऊर्जा मूल्य बढेमा त्यसले विश्वव्यापी मुद्रास्फीतिमा थप दबाब सिर्जना गर्न सक्छ। यस्तो अवस्थामा केन्द्रीय बैंकहरूले ब्याजदर बढाउन सक्ने सम्भावना रहन्छ। ब्याजदर वृद्धि हुँदा ब्याज नदिने सम्पत्ति मानिने सुनमा लगानी गर्ने आकर्षण केही घट्न सक्ने भएकाले सुनको मूल्यमा दबाब पर्न सक्ने विश्लेषण गरिएको छ।
गत साता अमेरिकी फेडरल रिजर्भका तीन अधिकारीहरूले मुद्रास्फीति दुई प्रतिशतको लक्ष्यभन्दा माथि रहने सम्भावना रहेको भन्दै आवश्यक परे ब्याजदर थप बढाउनुपर्ने धारणा सार्वजनिक गरेका थिए। यसैबीच, यस साताभित्र सार्वजनिक हुने अमेरिकी रोजगारीसम्बन्धी आर्थिक सूचकहरू, विशेषगरी गैर–कृषि रोजगारी (नन–फार्म पेरोल) प्रतिवेदनले सुन बजारको आगामी दिशा निर्धारणमा महत्वपूर्ण भूमिका खेल्ने अपेक्षा गरिएको छ।
सुनसँगै अन्य बहुमूल्य धातुको मूल्य पनि सोमबार बढेको छ। चाँदीको मूल्य ०.९ प्रतिशतले वृद्धि भएर प्रतिऔंस ५८ डलर १३ सेन्ट पुगेको छ। त्यसैगरी, प्लाटिनम ०.५ प्रतिशतले बढेर प्रतिऔंस १ हजार ६४९ डलर ३५ सेन्ट पुगेको छ भने प्यालेडियमको मूल्य १.७ प्रतिशतले वृद्धि हुँदै प्रतिऔंस १ हजार २९४ डलर ९२ सेन्ट पुगेको छ। यसले अन्तर्राष्ट्रिय कमोडिटी बजारमा बहुमूल्य धातुप्रतिको लगानीकर्ताको आकर्षण अझै कायम रहेको संकेत गरेको छ।
