नेपाल सरकारले नेपाल फार्मेसी परिषद्को अध्यक्षमा डा. कादिर आलमलाई नियुक्त गरेको छ। नियुक्तिपछि उनले बुधबार स्वास्थ्य तथा खाद्य स्वच्छता मन्त्री निशा मेहताको उपस्थितिमा पद तथा गोपनीयताको शपथ ग्रहण गर्दै औपचारिक रूपमा आफ्नो जिम्मेवारी सम्हालेका छन्।
सरकारले परिषद्को नेतृत्व चयनका लागि खुला आवेदनमार्फत उम्मेदवार छनोट प्रक्रिया अघि बढाएको थियो। सोही प्रक्रियाअन्तर्गत विभिन्न चरणको मूल्यांकनपछि डा. आलम अध्यक्ष पदका लागि छनोट भएका हुन्। उनको नियुक्तिसँगै परिषद्ले नयाँ नेतृत्व पाएको छ।
शपथ ग्रहण समारोहमा स्वास्थ्य तथा खाद्य स्वच्छता मन्त्री मेहताले नवनियुक्त अध्यक्षलाई सफल कार्यकालको शुभकामना दिँदै परिषद्को संस्थागत क्षमता थप सुदृढ बनाउन आग्रह गरिन्। उनले औषधिको गुणस्तर, सुरक्षित प्रयोग तथा फार्मेसी क्षेत्रको प्रभावकारी नियमनमा परिषद्को भूमिका अझ जिम्मेवार र परिणाममुखी हुनुपर्नेमा जोड दिइन्।
मन्त्री मेहताले फार्मेसी शिक्षाको गुणस्तर सुधार, पेसागत आचारसंहिताको प्रभावकारी कार्यान्वयन, दक्ष जनशक्ति उत्पादन तथा औषधि सेवाप्रति नागरिकको विश्वास अभिवृद्धि गर्न परिषद्ले सक्रिय रूपमा काम गर्नुपर्ने आवश्यकता औँल्याइन्। उनले पारदर्शिता, सुशासन र उत्तरदायित्वलाई संस्थागत संस्कृतिका रूपमा विकास गर्न पनि निर्देशन दिइन्।
नेपाल फार्मेसी परिषद् फार्मेसी पेशाको नियमन, फार्मासिस्ट तथा फार्मेसी सहायकको दर्ता, पेसागत मापदण्ड निर्धारण, फार्मेसी शिक्षाको अनुगमन तथा औषधि सेवाको गुणस्तर प्रवर्द्धन गर्ने प्रमुख नियामक निकाय हो। परिषद्को नेतृत्वले स्वास्थ्य प्रणालीमा औषधि व्यवस्थापनलाई थप व्यवस्थित र विश्वसनीय बनाउन महत्वपूर्ण भूमिका खेल्ने अपेक्षा गरिन्छ।
नवनियुक्त अध्यक्ष डा. आलमले परिषद्को जिम्मेवारीलाई प्रभावकारी रूपमा निर्वाह गर्दै संस्थागत सुधार, सेवा प्रवाहको गुणस्तर अभिवृद्धि तथा फार्मेसी क्षेत्रको व्यावसायिक विकासलाई प्राथमिकतामा राखेर काम गर्ने प्रतिबद्धता व्यक्त गरेका छन्।
सरकारले परिषद्को नेतृत्वमा नयाँ नियुक्ति गरेसँगै औषधि सेवा, फार्मेसी शिक्षा र पेसागत नियमनलाई समयानुकूल बनाउने तथा नागरिकलाई गुणस्तरीय स्वास्थ्य सेवा उपलब्ध गराउने दिशामा परिषद्ले थप सक्रिय भूमिका खेल्ने अपेक्षा गरिएको छ।
