प्रधानमन्त्री बालेन्द्र शाह (बालेन) शुक्रबार मुस्ताङ भ्रमणका लागि प्रस्थान गरेका छन्। धादिङ हुँदै पोखरा पुगेका प्रधानमन्त्रीको यात्रा यसपटक विशेष चासोको विषय बनेको छ, किनभने भ्रमणको उद्देश्य, विस्तृत कार्यतालिका तथा औपचारिक कार्यक्रमबारे सुरक्षा निकाय र स्थानीय प्रशासनलाई समेत स्पष्ट जानकारी उपलब्ध गराइएको छैन।
स्रोतका अनुसार प्रधानमन्त्री शाह बिहानै काठमाडौंबाट प्रस्थान गरी धादिङ पुगेका थिए। त्यसपछि उनी पोखरा हुँदै मुस्ताङ जाने कार्यक्रमअनुसार अघि बढेका छन्। यद्यपि भ्रमणको प्रकृति सरकारी, निजी वा धार्मिकमध्ये कुन उद्देश्यका लागि हो भन्ने विषयमा आधिकारिक जानकारी सार्वजनिक गरिएको छैन।
कास्की जिल्ला प्रहरी कार्यालयका अधिकारीहरूले प्रधानमन्त्रीको भ्रमणबारे कुनै औपचारिक सूचना प्राप्त नभएको बताएका छन्। सामान्यतया उच्च तहका विशिष्ट व्यक्तिहरूको भ्रमणअघि सुरक्षा, आवागमन र समन्वयका लागि सम्बन्धित निकायलाई अग्रिम जानकारी दिइने प्रचलन रहे पनि यसपटक त्यस्तो प्रक्रिया स्पष्ट रूपमा अघि नबढेको देखिएको छ।
यस्तै, मुस्ताङ जिल्ला प्रहरी कार्यालयले पनि प्रधानमन्त्रीको भ्रमणबारे औपचारिक जानकारी प्राप्त नभएको जनाएको छ। मुस्ताङका प्रहरी प्रमुख डीएसपी रामचन्द्र तिवारीले भ्रमणबारे विस्तृत विवरण नआए पनि सम्भावित सुरक्षा आवश्यकतालाई ध्यानमा राख्दै प्रहरी प्रशासन तयारी अवस्थामा रहेको बताए। उनले आवश्यक समन्वयका लागि जिल्ला सुरक्षा संयन्त्र सतर्क रहेको जानकारी दिए।
प्रधानमन्त्री शाह शुक्रबार अपराह्न पोखरा आइपुग्ने र त्यसपछि कास्कीको अन्नपूर्ण गाउँपालिकास्थित रमणीय पर्यटकीय गाउँ अस्ताममा रहने कार्यक्रम रहेको स्रोतको दाबी छ। त्यहाँ रहेको अन्नपूर्ण इको भिलेज रिसोर्टमा प्रधानमन्त्रीका लागि आवासको व्यवस्था मिलाइसकिएको बताइएको छ। उनी साँझसम्म रिसोर्टमा पुग्ने सम्भावना रहेको जनाइएको छ।
अस्ताम पछिल्लो समय आन्तरिक तथा बाह्य पर्यटकबीच लोकप्रिय गन्तव्यका रूपमा परिचित छ। पोखराबाट करिब साढे चार किलोमिटर दूरीमा रहेको यो स्थानबाट माछापुच्छ्रे, अन्नपूर्ण तथा आसपासका हिमशृंखलाको मनमोहक दृश्य नजिकैबाट अवलोकन गर्न सकिन्छ। प्राकृतिक सौन्दर्य, शान्त वातावरण र हिमाली दृश्यावलोकनका कारण अस्ताम विशेष आकर्षणको केन्द्र मानिन्छ।
यसैबीच, प्रधानन्यायाधीश मनोजकुमार शर्माको पनि शुक्रबार पोखरा, बाग्लुङ हुँदै मुस्ताङ जाने कार्यक्रम रहेको जानकारी प्राप्त भएको छ। उच्च पदस्थ दुई व्यक्तित्वको एकै दिन मुस्ताङतर्फको यात्राले विभिन्न अड्कलबाजी जन्माएको भए पनि दुवै भ्रमणबीच कुनै औपचारिक सम्बन्ध रहेको पुष्टि भएको छैन।
