नेकपा एमाले केन्द्रीय कमिटीको तेस्रो बैठकको दोस्रो दिन आज बिहान ९ बजेबाट सुरु हुँदैछ। ललितपुरको भनिमण्डलस्थित रामवाग पार्टी प्यालेसमा जारी बैठकमा आजदेखि केन्द्रीय सदस्यहरूले पार्टीको राजनीतिक प्रतिवेदन, पार्टी र अध्यक्षसँग सम्बन्धित विषय तथा समसामयिक राजनीतिक परिस्थितिबारे आफ्ना धारणा राख्ने क्रम सुरु हुने भएको छ।
एमालेका प्रचार तथा प्रकाशन विभाग प्रमुख निरज आचार्यका अनुसार बैठकमा धारणा राख्न प्रत्येक केन्द्रीय सदस्यलाई बढीमा तीन मिनेटको समय उपलब्ध गराइएको छ। छोटो समयमा आफ्ना विचार राख्नुपर्ने भएकाले सदस्यहरूले पार्टीको आगामी दिशा, संगठनात्मक अवस्था, अध्यक्षको प्रतिवेदन तथा जनतासँग पार्टीको सम्बन्धलगायत विषयमा केन्द्रित भएर धारणा राख्ने तयारी गरेका छन्।
बैठकको पहिलो दिन अध्यक्ष केपी शर्मा ओलीले पार्टीको राजनीतिक प्रतिवेदन प्रस्तुत गरेका थिए। अध्यक्ष ओलीले बैठकमा पार्टीको वर्तमान राजनीतिक अवस्था, आगामी कार्यदिशा तथा संगठनलाई प्रभावकारी बनाउने विषय समेटेर प्रतिवेदन प्रस्तुत गरेको एमालेले जनाएको छ।
पहिलो दिन अध्यक्ष ओलीले बैठकका लागि नौ वटा एजेन्डा प्रस्तुत गरेका थिए। तीमध्ये आठ वटा एजेन्डामाथिको कारबाही आजदेखि अघि बढाइने तयारी छ। बैठकमा अब पार्टीको सांगठनिक संरचना र जिम्मेवारी बाँडफाँडसँग सम्बन्धित महत्वपूर्ण विषयमा छलफल हुने भएको छ।
आजको बैठकमा केन्द्रीय कमिटीमा सदस्यहरूको मनोनयनबाट संगठनात्मक प्रक्रिया अघि बढाउने तयारी गरिएको छ। त्यसपछि विभिन्न विभाग गठन, पोलिटब्युरो गठन तथा स्थायी कमिटी गठनका विषयमा प्रक्रिया अगाडि बढाइनेछ। पार्टीका महत्वपूर्ण संरचनालाई पूर्णता दिने भएकाले यी एजेन्डालाई बैठकले प्राथमिकताका साथ अघि बढाउने तयारी गरेको एमाले स्रोतले जनाएको छ।
त्यसैगरी बैठकबाट सल्लाहकार परिषद् गठन, ज्येष्ठ कम्युनिष्ट मञ्चसम्बन्धी व्यवस्था तथा अनुशासनका विषयमा पार्टीको दृष्टिकोण तय गर्ने तयारी पनि गरिएको छ। यी विषयमा छलफल गरी आवश्यक निर्णय लिने कार्यसूची एमालेले बनाएको छ।
एमाले स्रोतका अनुसार आजै केन्द्रीय सदस्यहरूको मनोनयन प्रक्रिया अघि बढाएर सदस्यहरूले बैठकमा आफ्ना धारणा राख्ने क्रमलाई निरन्तरता दिइनेछ। संगठनका विभिन्न तहमा जिम्मेवारी बाँडफाँड भने क्रमशः अघि बढाउने तयारी छ।
एक पदाधिकारीका अनुसार पोलिटब्युरो, स्थायी कमिटी लगायतका संरचनामा रहने नेताहरूको जिम्मेवारी बाँडफाँडको काम भने भोलि गर्ने तयारी गरिएको छ। त्यसका लागि आजको छलफल र बैठकबाट प्राप्त सुझावलाई समेत आधार बनाइने बताइएको छ।
केन्द्रीय कमिटी बैठकले पार्टीको राजनीतिक प्रतिवेदनमाथि सदस्यहरूको धारणा सुन्नुका साथै आगामी संगठनात्मक संरचना र जिम्मेवारीलाई पनि टुंगो लगाउने तयारी गरेको छ। तीन दिनसम्म चल्ने बैठकमा पार्टीको राजनीतिक तथा सांगठनिक विषयसँगै समसामयिक परिस्थितिबारे समेत छलफल हुने एमालेले जनाएको छ।
