नेपाली कांग्रेसको १५औँ महाधिवेशनबाट महिला उपसभापति पदमा पुष्पा भुसाल निर्विरोध निर्वाचित भएकी छन्। मंगलबार नयाँ नेतृत्व चयनका लागि भएको उम्मेदवारी मनोनयन प्रक्रियामा महिला उपसभापति पदमा भुसालको मात्रै उम्मेदवारी परेपछि उनी निर्विरोध निर्वाचित भएकी हुन्।
कांग्रेसको संशोधित विधानअनुसार उपसभापतिका चार पदमध्ये एक पद महिलाका लागि आरक्षित गरिएको छ। सोही व्यवस्थाअनुसार भुसालले महिला उपसभापति पदमा उम्मेदवारी दिएकी थिइन्। मनोनयन दर्ताको निर्धारित समयभित्र उक्त पदमा भुसालबाहेक अन्य उम्मेदवारले उम्मेदवारी नदिएपछि उनी निर्विरोध चयन भएकी हुन्।
भुसाल यसअघि कांग्रेसको विशेष महाधिवेशनबाट उपसभापतिमा निर्वाचित भएकी थिइन्। १५औँ महाधिवेशनमा पनि सोही जिम्मेवारीलाई निरन्तरता दिने उद्देश्यले उनले महिला उपसभापतिमा उम्मेदवारी दिएकी हुन्। यसअघि उनले आफूले पाएको जिम्मेवारीलाई पूर्ण कार्यकाल पूरा गर्ने इच्छा रहेको बताएकी थिइन्।
महाधिवेशनका लागि भुसाल अर्घाखाँचीबाट खस–आर्य महिला क्लस्टरतर्फ महाधिवेशन प्रतिनिधिमा निर्वाचित भएकी थिइन्। प्रतिनिधि निर्वाचनमा उनले १ हजार ४ सय ४६ मत प्राप्त गरेकी थिइन्।
मंगलबार भएको मनोनयन प्रक्रियामा महिला उपसभापतिसँगै वरिष्ठ उपसभापति पदमा पनि एक–एक जनाको मात्रै उम्मेदवारी परेको थियो। वरिष्ठ उपसभापतिमा विश्वप्रकाश शर्मा निर्विरोध भएका छन्।
कांग्रेसको १५औँ महाधिवेशन काठमाडौंमा जारी छ। नयाँ नेतृत्वका अन्य पदमा भने प्रतिस्पर्धाका लागि विभिन्न नेताहरूले उम्मेदवारी दर्ता गरेका छन्।
