नेपाली कांग्रेसको सहमहामन्त्री (खुला) पदमा रामहरि खतिवडा र अजयबाबु शिवाकोटी निर्वाचित भएका छन्। दुई पदका लागि भएको निर्वाचनमा नौ जना उम्मेदवारबीच प्रतिस्पर्धा हुँदा खतिवडा र शिवाकोटीले सर्वाधिक मत प्राप्त गर्दै विजय हासिल गरेका हुन्।
मतपरिणामअनुसार खतिवडाले २ हजार ९१० मत प्राप्त गरेका छन् भने शिवाकोटीले २ हजार १७३ मत पाएका छन्। मतगणनाको सुरुदेखि नै दुवै उम्मेदवारले अग्रता कायम राखेका थिए। अन्य उम्मेदवारलाई पछि पार्दै उनीहरू सहमहामन्त्री पदमा निर्वाचित भएका हुन्।
ओखलढुंगाका खतिवडा पछिल्लो समय पार्टीको संस्थापन पक्षसँग निकट मानिन्थे। उनी गत पुसमा आयोजित कांग्रेसको विशेष महाधिवेशनमा सहभागी भएका थिएनन्। खतिवडा २०७८ सालमा सम्पन्न पार्टीको १४औँ महाधिवेशनबाट केन्द्रीय सदस्यमा निर्वाचित भएका थिए। यसपटक सहमहामन्त्री पदमा विजय हासिल गरेसँगै पार्टीको केन्द्रीय नेतृत्वमा उनको जिम्मेवारी थपिएको छ।
त्यस्तै, दोलखाका शिवाकोटी प्रेस युनियनको महासचिव पद छाडेर सक्रिय पार्टी राजनीतिमा प्रवेश गरेका थिए। उनी पनि कांग्रेसको १४औँ महाधिवेशनबाट केन्द्रीय सदस्य निर्वाचित भएका थिए। विशेष महाधिवेशनबाट समेत केन्द्रीय सदस्य बनेका शिवाकोटीले यसपटक सहमहामन्त्री पदमा सफलता प्राप्त गरेका छन्।
सहमहामन्त्री (खुला) पदका अन्य प्रतिस्पर्धीमध्ये डिल्लीराम सुवेदीले १ हजार ८५२ मत प्राप्त गरेका छन्। त्यसैगरी देवेन्द्रराज कँडेलले १ हजार ३८१, राजीव ढुंगानाले १ हजार २३२, विकास कोइरालाले १ हजार १४४ र अमृतकुमार अर्यालले ९२१ मत पाएका छन्।
त्यस्तै, रमेशप्रसाद धमलाले ७८० मत प्राप्त गर्दा विमलराज क्षेत्रीले २८३ मत पाएका छन्।
नौ जना उम्मेदवार प्रतिस्पर्धामा रहेको खुला सहमहामन्त्री पदमा खतिवडा र शिवाकोटीको विजयले पार्टीभित्र उनीहरूको राजनीतिक प्रभाव र नेतृत्वमा थप जिम्मेवारी प्राप्त भएको देखाएको छ। निर्वाचन परिणामसँगै नेपाली कांग्रेसको नयाँ केन्द्रीय नेतृत्व चयन प्रक्रिया थप अघि बढेको छ।
