चिनियाँ अटोमोबाइल ब्रान्ड चेरीको नयाँ इलेक्ट्रिक एसयूभी ‘चेरी क्यू’को नेपालमा डेलिभरी सुरु भएको छ। नेपालका लागि चेरीको आधिकारिक बिक्रेता पायोनियर मोटोकर्प प्रालिले देशका प्रमुख पाँच सहरमा एकैसाथ ग्राहकलाई गाडी हस्तान्तरण गर्न थालेको हो।
कम्पनीका अनुसार काठमाडौंसहित चितवन, बिर्तामोड, बुटवल र विराटनगरमा चेरी क्यूको डेलिभरी सुरु गरिएको छ। विभिन्न सहरबाट ग्राहकले गाडी प्राप्त गर्न थालेसँगै नेपाली बजारमा चेरीको विद्युतीय एसयूभीको उपस्थिति विस्तार हुने कम्पनीको अपेक्षा छ।
चेरी क्यूमा ४१.२ किलोवाट आवर (kWh) क्षमताको ब्याट्री प्याक जडान गरिएको छ। कम्पनीका अनुसार यसले एकपटक पूर्ण चार्ज गर्दा ४०० किलोमिटरसम्म यात्रा गर्न सक्छ। लामो रेन्ज र आधुनिक प्रविधिलाई प्राथमिकता दिने ग्राहकलाई लक्षित गरी यो विद्युतीय एसयूभी बजारमा ल्याइएको कम्पनीले जनाएको छ।
यस गाडीमा विभिन्न आधुनिक सुरक्षा तथा सुविधायुक्त प्रविधि समावेश गरिएको छ। चेरी क्यूमा ५४० डिग्री क्यामेरा प्रणाली उपलब्ध छ, जसले चालकलाई गाडी वरिपरिको अवस्थाबारे जानकारी लिन सहयोग गर्छ। त्यस्तै, १८५ मिलिमिटर ग्राउन्ड क्लियरेन्सले विभिन्न सडक अवस्थामासमेत सहज यात्रा गर्न सहयोग पुग्ने अपेक्षा गरिएको छ।
गाडीमा ७० लिटर क्षमताको विद्युतीय फ्रङ्क (अगाडिको सामान राख्ने स्थान) समेत उपलब्ध छ। यसका अतिरिक्त १५.६ इन्चको ठूलो टचस्क्रिन इन्फोटेनमेन्ट सिस्टम जडान गरिएको छ।
सुरक्षाका लागि चेरी क्यूमा २० भन्दा बढी एडभान्स्ड ड्राइभर असिस्टेन्स सिस्टम (ADAS) सुविधा समावेश गरिएको कम्पनीले जनाएको छ। यी प्रविधिले चालकलाई सम्भावित जोखिम पहिचान गर्न र सुरक्षित ड्राइभिङमा सहयोग पुर्याउनेछन्।
