ललितपुरको जावलाखेलमा सञ्चालन भइरहेको १९औँ गोदावरी फूलको प्रतियोगितात्मक प्रदर्शनीमा चार दिनको अवधिमा करिब एक करोड रुपैयाँ बराबरको कारोबार भएको छ। फ्लोरिकल्चर एसोसिएसन नेपालको आयोजनामा कात्तिक १२ गतेदेखि सुरु भएको प्रदर्शनीमा चौथो दिनसम्म ३१ हजारभन्दा बढी दर्शकले अवलोकन गरेका छन्।
आयोजकका अनुसार प्रदर्शनीमा हालसम्म ९९ लाख ९० हजार रुपैयाँ बराबरको कारोबार भएको छ। प्रदर्शनी सुरु भएयता फूल तथा अन्य पुष्पजन्य सामग्रीप्रति सर्वसाधारणको आकर्षण देखिएको भए पनि बीचमा परेको अविरल वर्षाका कारण कारोबार प्रभावित भएको हो।
प्रदर्शनीको पहिलो चरणमा अपेक्षा गरिएभन्दा राम्रो व्यापार भएको थियो। तर शुक्रबार र शनिबार लगातार वर्षा भएपछि मेला सञ्चालनमा समस्या उत्पन्न भएको थियो। वर्षाका कारण मेला स्थल नै बन्द गर्नुपर्ने अवस्था आएपछि प्रदर्शनीमा सहभागी व्यवसायी र अवलोकन गर्न आउने सर्वसाधारण दुवै प्रभावित भएका थिए।
मौसम प्रतिकूल हुँदा दर्शकको उपस्थिति घट्नुका साथै फूल तथा बिरुवाको बिक्रीसमेत प्रभावित भएको आयोजकले जनाएको छ। निर्धारित अवधिमा अपेक्षित कारोबार हुन नसकेपछि व्यवसायी र अवलोकनकर्ताको आग्रहलाई ध्यानमा राख्दै प्रदर्शनीको समय दुई दिन थप गर्ने निर्णय गरिएको फ्लोरिकल्चर एसोसिएसन नेपालले जनाएको छ।
यसअघि कात्तिक १६ गतेसम्म सञ्चालन हुने तय भएको प्रदर्शनी अब कात्तिक १८ गतेसम्म जारी रहनेछ। अवधि थपिएसँगै पुष्प व्यवसायीलाई आफ्ना उत्पादन बिक्री गर्ने थप अवसर प्राप्त भएको छ भने फूलप्रेमी सर्वसाधारणले पनि प्रदर्शनी अवलोकन तथा खरिदका लागि थप समय पाउने भएका छन्।
आयोजकका अनुसार प्रदर्शनीको पाँचौँ दिन नेपाल उद्योग वाणिज्य महासंघकी पूर्वअध्यक्ष भवानी राणाले समेत मेला अवलोकन गरेकी थिइन्। उनले प्रदर्शनीमा राखिएका विभिन्न प्रजातिका फूल तथा बिरुवाको अवलोकन गर्नुका साथै आफूलाई मन परेका फूल र बिरुवा खरिदसमेत गरेकी थिइन्।
प्रदर्शनीमा विभिन्न प्रजातिका गोदावरी फूलसँगै अन्य सजावटी फूल, बोटबिरुवा तथा पुष्पजन्य सामग्री राखिएका छन्। पुष्प व्यवसायको प्रवर्द्धन, नेपाली फूल उत्पादकलाई बजार उपलब्ध गराउने र सर्वसाधारणलाई विभिन्न प्रजातिका फूलबारे जानकारी दिने उद्देश्यले प्रतियोगितात्मक प्रदर्शनी आयोजना गरिएको हो।
विशेषगरी गोदावरी फूलका विभिन्न प्रजाति, तिनको रंग, आकार र सजावटले प्रदर्शनीलाई आकर्षक बनाएको छ। प्रदर्शनीमा सहभागी पुष्प व्यवसायीले आफ्ना उत्पादन प्रदर्शन तथा बिक्रीका लागि राखेका छन्। यसले फूल उत्पादन तथा व्यावसायिक पुष्पखेतीप्रति सर्वसाधारणको रुचि बढाउन सहयोग पुग्ने आयोजकको अपेक्षा छ।
प्रदर्शनीको अवधि थप गरिएपछि अब कात्तिक १८ गतेसम्म जावलाखेल पुगेर इच्छुक व्यक्तिले विभिन्न प्रजातिका फूल तथा बिरुवा अवलोकन गर्न र खरिद गर्न सक्नेछन्।
