बैंकहरूमा गाडी कर्जाको माग अझै सन्तोषजनक ढंगले सुधारिएको छैन। नेपाल राष्ट्र बैंकले सार्वजनिक गरेको चालु आर्थिक वर्ष २०८१/८२ को १० महिनासम्म (वैशाखसम्म) को तथ्यांकले गाडी कर्जामा केवल ६.१३ प्रतिशतको वृद्धि देखिएको छ।
२० वटा वाणिज्य बैंकमार्फत वैशाखसम्म कुल १ खर्ब १३ अर्ब ४ करोड ५४ लाख रुपैयाँ बराबरको गाडी कर्जा प्रवाह भएको छ। अघिल्लो वर्ष यही अवधिमा यो कर्जा १ खर्ब ६ अर्ब ५२ करोड ५ लाख रुपैयाँ थियो। यसरी गाडी कर्जामा थोरै मात्र वृद्धिले माग अझै सुस्त रहेको संकेत गर्छ।
११ वटाभन्दा बढी बैंकको गाडी कर्जा अघिल्लो वर्षको तुलनामा घटेको छ भने ९ वटाको मात्र बढेको छ । गाडी कर्जा प्रवाहका आधारमा ग्लोबल आइएमई बैंक अग्रस्थानमा रहेको छ। उक्त बैंकले वैशाखसम्म १५ अर्ब ७१ करोड रुपैयाँ गाडी कर्जा प्रवाह गरेको छ, जुन अघिल्लो वर्षको तुलनामा १४.६० प्रतिशतले बढी हो।
दोस्रो स्थानमा नबिल बैंक रहेको छ, जसले ११ अर्ब ६३ करोड रुपैयाँ गाडी कर्जा प्रवाह गरेको छ—१२.६१ प्रतिशतको वृद्धि। तेस्रो स्थानमा रहेको राष्ट्रिय वाणिज्य बैंकले भने गाडी कर्जामा सर्वाधिक वृद्धिदर देखाएको छ। अघिल्लो वर्ष ५ अर्ब ७७ करोड रहेको कर्जा प्रवाह यो वर्ष ९ अर्ब ११ करोड पुगेको छ, जुन ५७.८६ प्रतिशतको वृद्धि हो।
यद्यपि समग्र बजार हेर्दा कर्जाको वृद्धिदर न्यून रहँदा गाडी बिक्री तथा मागमा अझै स्पष्ट सुधार नआएको विश्लेषण गर्न सकिन्छ।
