कतार एयरवेजले जहाजभित्र कफी पोखिएर घाइते भएकी यात्रुलाई साढे २ करोड बढी क्षतिपूर्ति दिनुपर्ने भएको छ।उपभोक्ता अदालतका न्यायाधीश दिवाकर भट्ट, गेहेन्द्रराज रेग्मी र आनन्दराज पोखरेलको इजलासले बिहीबार एयरवेजले २ करोड ६१ लाख ५२ हजार ४०६ रुपैयाँ क्षतिपूर्ति दिनुपर्ने फैसला गरेको हो। मोन्ट्रियल कन्भेन्सन अनुसार २ करोड ४१ लाख ५२ हजार ४०६ रुपैयाँ र उपभोक्ता संरक्षण ऐन अनुसार थप २० लाख रुपैयाँ क्षतिपूर्ति दिनु पर्ने अदालतको फैसला छ।
जहाजमा चालक दलकै सदस्यबाट कफी पोखिएर घाइते भएकी ललितपुरकी प्रिती थापाले २० लाख अमेरिकी डलर क्षतिपूर्ति माग गर्दै मुद्दा दायर गरेकी थिइन्। उनी सन् २०२३ जुन १० मा कतार ऐयरवेजमार्फत काठमाडौँबाट दोहा हुँदै बोस्टन गएकी थिइन्। जुलाई १० मा बोस्टनबाट दोहा हुँदै काठमाडौँ फर्किने तालिका थियो।
बोस्टनबाट दोहा आउने क्रममा विमानमा दिइएको तातो कफी पोखिएर उनको पेट, तिघ्रा तथा संवेदनशील अंगमा समेत पोलेको थियो। उनलाई विमान अवतरणपछि हमाद विमानस्थलस्थित आकस्मिक उपचार कक्षमा प्राथमिक उपचार गराइएको थियो। त्यहीँ स्वास्थ्यकर्मीले उनको जलन दोस्रो तहमा पुगेको पहिचान गरेका थिए। त्यसपछि काठमाडौँ आएर उनी कीर्तिपुर वर्न अस्पताल भर्ना भएकी थिइन्।
यसअघि थापाले एयरवेजसँग आन्तरिकरूपमै क्षतिपूर्ति दाबी गरे पनि कम्पनी तयार नभएपछि अदालत गएकी थिइन्। उपभोक्ता अदालतले उनको पक्षमा फैसला गरेसँगै अब एयरवेजले कि यो फैसला कार्यान्वयन गर्नुपर्ने हुन्छ। नभए अदालतले दिएको समयमा माथिल्लो अदालतमा पुनरावेदन गर्न सक्नेछ।
