नेकपा एमालेका अध्यक्ष केपी शर्मा ओलीले वर्तमान समयमा समाजवाद निर्माण भन्दा पनि ‘प्रतिगमन’ विरुद्धको लडाइँ मुख्य प्राथमिकता हुनुपर्नेमा जोड दिएका छन्। ‘नेपालको कम्युनिस्ट आन्दोलन र जननेता मदन भण्डारी’ विषयक विचार गोष्ठीलाई सम्बोधन गर्दै उनले देशका सम्पूर्ण लोकतान्त्रिक तथा वामपन्थी शक्तिहरू एकजुट भएर अहिलेको प्रतिगमनलाई पराजित गर्नुपर्ने आवश्यकता औंल्याए।
कार्यगत एकताको माध्यमबाट मात्रै यो चुनौतीलाई चिर्न सकिने उल्लेख गर्दै अध्यक्ष ओलीले प्रतिगमन शक्तिलाई परास्त गर्नु नै यतिबेलाको अनिवार्य सर्त भएको दाबी गरे। सम्बोधनका क्रममा ओलीले पछिल्लो समय वामपन्थी विचार र नेतृत्वको चरित्र हत्या गर्ने नियोजित प्रयास भइरहेको भन्दै आपत्ति समेत जनाए।
पार्टीको वैचारिक स्पष्टता स्पष्ट पार्दै उनले नेकपा एमालेका नीतिहरू पूर्ण रूपमा सही रहेको र नीतिगत विषयमा कुनै पनि प्रकारको सम्झौता वा एकीकरणका नाममा अल्झिने पक्षमा पार्टी नरहेको स्पष्ट पारे। जननेता मदन भण्डारीद्वारा प्रतिपादित ‘जनताको बहुदलीय जनवाद’ (जबज) लाई समयानुकूल परिमार्जन र परिष्कृत गर्दै आफ्नो पार्टी निरन्तर अगाडि बढिरहेको उनको भनाइ थियो।
