कामना सेवा विकास बैंकले आफ्नो विद्युतीय बैंकिङ सेवालाई अझ फराकिलो र सबल बनाउने लक्ष्यका साथ ‘नेपालपे’ कार्ड निष्कासन तथा स्विकारोक्ति (अक्वायर) सेवा औपचारिक रूपमा सुरु गरेको छ। राष्ट्रिय भुक्तानी प्रणाली (नेशनल पेमेन्ट स्विच) अन्तर्गत सञ्चालनमा रहेको यो स्वदेशी कार्ड अब बैंकले आफ्ना खातावालाहरूलाई वितरण गर्नेछ। यस नयाँ प्रविधिसँगै बैंकका देशभर रहेका सम्पूर्ण स्वचालक यन्त्र (एटीएम) हरूबाट नेपालपे कार्डका साथै अन्तर्राष्ट्रिय ‘डिस्कभर’ सञ्जालका कार्डहरू प्रयोग गरी सहजै रकम झिक्न र कारोबार गर्न सकिने भएको छ।
नेपाल क्लियरिङ हाउस (एनसीएचएल) ले नेपालपे कार्डको व्यावसायिक सञ्चालन थालेसँगै र अन्तर्राष्ट्रिय सञ्जाल ‘डिस्कभर’ सँग साझेदारी गरेपछि यो कार्ड विश्वभर प्रयोग गर्न सकिने भएको हो। यस व्यवस्था अनुसार नेपाली बैंक तथा वित्तीय संस्थाहरूले जारी गरेका कार्डहरू नेपालका साथै विदेशका नगद यन्त्र र भुक्तानी केन्द्र (पीओएस) हरूमा चल्नेछन्। यसैगरी भारतको ‘रुपे’ कार्ड लगायत अन्य अन्तर्राष्ट्रिय डिस्कभर कार्डहरू पनि अब नेपालभित्रै सहजै प्रयोग गर्न सकिनेछ।
हालसम्म ३६ भन्दा बढी बैंक तथा वित्तीय संस्थाहरू यो राष्ट्रिय कार्ड प्रणालीमा आबद्ध भइसकेका छन्, जसमध्ये ७ वटाले कार्ड वितरण र १० भन्दा बढीले स्विकारोक्ति सेवा सुरु गरिसकेका छन्। देशको अग्रणी विकास बैंकको रूपमा स्थापित कामना सेवा विकास बैंकले आफ्ना १२२ शाखा, १ अतिरिक्त काउन्टर र ६६ वटा नगद यन्त्रमार्फत करिब ८ लाख ग्राहकहरूलाई निरन्तर बैंकिङ सेवा प्रदान गर्दै आइरहेको छ।
