सङ्घीय निजामती सेवाको गठन, सञ्चालन र सेवाका सर्त सम्बन्धी विधेयकको मस्यौदालाई लिएर सङ्घीय मामिला तथा सामान्य प्रशासन मन्त्रालय र कानुन, न्याय तथा संसदीय मामिला मन्त्रालयबिच विवाद देखिएको छ । सामान्य प्रशासन मन्त्रालयले स्वीकृतिका लागि पठाएको ३५ दिनभन्दा बढी भइसक्दा पनि कानुन मन्त्रालयले उक्त मस्यौदा फिर्ता गरेको छैन । वैशाख ११ गते सार्वजनिक भई सरोकारवालाको सुझाव र जेठ ६ गते अर्थ मन्त्रालयको स्वीकृतिसमेत समेटेर जेठ १२ गते कानुन मन्त्रालय पठाइएको यो विधेयक अहिले दुई मन्त्रालयको आन्तरिक टसलका कारण रोकिएको हो ।
सामान्य प्रशासन मन्त्री प्रतिभा रावल र सचिव मदन भुजेल निकट स्रोतका अनुसार पटक-पटक ताकेता गर्दा र छलफलका लागि आग्रह गर्दा पनि कानुन मन्त्रालयले कुनै ठोस जवाफ दिएको छैन । यता कानुन मन्त्रालयले भने विधेयकमा समेटिएका कतिपय नयाँ नीतिहरू विद्यमान संविधान र कानुनसँग बाझिने खालका भएकाले दुई मन्त्रीबिचको उच्चस्तरीय छलफल र दिशा निर्देशविना यसलाई अगाडि बढाउन नसकिने अडान लिएको छ ।
मन्त्रालयको नीति महाशाखाका अनुसार सङ्घीयतामा कर्मचारी व्यवस्थापन, राजनीतिक गतिविधिमा संलग्न भए तत्कालै बर्खास्त गर्ने, ५५ वर्षमा अवकाश वा ३० वर्षे सेवा अवधि पूरा भएपछि अनिवार्य अवकाश दिने जस्ता कडा प्रावधानहरूमा मन्त्रीस्तरमै राजनीतिक सहमति हुन आवश्यक छ । बालेन शाह नेतृत्वको सरकारमा कानुनमन्त्री सोबिता गौतम र सामान्य प्रशासनमन्त्री प्रतिभा रावलबिच समय नमिल्दा कर्मचारी स्तरबाट मात्रै यो विषय सुल्झिन नसकेको कानुन मन्त्रालय स्रोतको दाबी छ ।
प्रस्तावित विधेयकको मस्यौदामा कर्मचारीको प्रवेश उमेर पुरुषका लागि ३२ र महिलाका लागि ३५ वर्ष तोकिएको छ भने सामान्य अवस्थामा अवकाशको उमेर ६० वर्ष प्रस्ताव गरिएको छ । तर, ऐन प्रारम्भ हुँदाका बखत ५५ वर्ष उमेर वा ३० वर्ष सेवा अवधि पूरा भएका कर्मचारीलाई अनिवार्य अवकाश दिने दफा ५७ को प्रावधान र ट्रेड युनियन खारेजी जस्ता कडा व्यवस्थाका कारण प्रशासनिक क्षेत्रमा निकै चासो र दबाब बढेको छ । यही अवकाश सम्बन्धी अन्योलका कारण निजामती कर्मचारीहरूले धमाधम राजीनामा दिने क्रम समेत बढेको छ, जसअन्तर्गत असार महिना लागेपछि मात्रै ७१ जना कर्मचारीले राजीनामा दिइसकेका छन् । कानुन मन्त्रालयबाट स्वीकृति पाएपछि मात्र मन्त्रिपरिषद् हुँदै संसद् सचिवालयमा दर्ता हुनुपर्ने कानुनी प्रक्रिया रहे पनि यो गतिरोधका कारण विधेयक तत्काल अघि बढ्ने सम्भावना न्यून देखिन्छ ।
