वाणिज्य बैंकहरूको नाफा १३.४७ प्रतिशतले घट्यो, सर्वाधिक नाफा कमाउनेमा नबिल बैंक

वाणिज्य न्युज
७ बैशाख २०८१

वाणिज्य बैंकहरूले चालू आर्थिक वर्षको तेस्रो त्रैमाससम्मको अपरिष्कृत वित्तीय विवरण प्रकाशित गरेका छन् । प्रकाशित विवरण हेर्दा वाणिज्य बैंकहरूको नाफा १३.४७ प्रतिशतले घटेको देखिएको छ ।

गत आवको सोही अवधिमा भने यस्तो नाफा ४७ अर्ब १ करोड ५२ लाख ९३ हजार रुपियाँ खुद नाफा कमाएका बैंकहरूले समीक्षा अवधिमा भने ४० अर्ब ६८ करोड ३० लाख ५२ हजार रुपियाँ कमाएका छन् । समीक्षा अवधिमा ७ वटा बैंकको खुद नाफा बढेको छ भने १३ वटा बैंकको नाफा घटेको छ । बैंकहरूको खराब कर्जा बढ्दा नाफा प्रभावित भएको वित्तीय विवरणले देखाएको छ ।

समीक्षा अवधिमा कृषि विकास बैंकको नाफा ९७.२२ प्रतिशतले बढेर २ अर्ब ५ करोड रुपियाँ पुगेको छ । त्यसैगरी, लक्ष्मी सनराइज बैंकको नाफा २७.७० प्रतिशत बढेर १ अर्ब ६१ करोड रुपियाँ पुगेको छ भने प्राइम बैंकको १६.६६ प्रतिशत बढेर २ अर्ब ८७ करोड रुपियाँ, सिद्धार्थ बैंकको १३.०१ प्रतिशत बढेर १ अर्ब ६८ करोड रुपियाँ पुगेको छ ।

यता हिमालयन बैंकको नाफा १२.०३ प्रतिशत, नेपाल इन्भेष्टमेन्ट मेगाको ७.५२ प्रतिशत एभरेष्ट बैंकको ५.७७ प्रतिशत नाफा बढेको छ ।

सिटिजन्स बैंकको १.९९ प्रतिशत घटेर १ अर्ब २१ करोड रुपियाँ, स्ट्याण्डर्ड चार्टर्ड बैंकको ६.२४ प्रतिशत घटेर २ अर्ब ४४ करोड रुपियाँ, प्रभु बैंकको ७.२७ प्रतिशत घटेर १ अर्ब ८१ करोड रुपियाँ, नबिल बैंकको ८.७५ प्रतिशत घटेर ४ अर्ब ६६ करोड रुपियाँ र सानिमा बैंकको १५.९० प्रतिशत घटेर १ अर्ब ४३ करोड रुपियाँ खुद नाफा गरेका छन् ।

एनएमबिको नाफा १६.४३ प्रतिशतले घटेर २ अर्ब २४ करोड रुपियाँ कायम भएको छ । त्यस्तै, कुमारी बैंकको १९.११ प्रतिशतले घटेर १ अर्ब ५ करोड रुपियाँ, नेपाल एसबिआई बैंकको ३५.४४ प्रतिशतले घटेर १ अर्ब १६ करोड रुपियाँ, माछापुच्छ«े बैंकको ३६.७२ प्रतिशत घटेर ८५ करोड ५४ लाख रुपियाँ, एनआईसी एशिया बैंकको ५३.३० प्रतिशतले घटेर १ अर्ब ९१ करोड रुपियाँ, नेपाल बैंकको ९२.६७ प्रतिशत घटेर १ अर्ब ३० करोड रुपियाँ नाफा गरेका हुन् ।

वाणिज्य बैंकहरूमध्ये सर्वाधिक नाफा घट्नेमा नेपाल बैंक र सर्वाधिक नाफा कमाउनेमा नबिल बैंक रहेको छ । नबिल बैंकले चालु आर्थिक वर्षको तेस्रो त्रैमाससम्ममा ४ अर्ब ६६ करोड रुपैयाँ खुद नाफा आर्जन गरेको छ । यो गत आर्थिक वर्षको सोही अवधिको तुलनामा ८.७६ प्रतिशत कम हो। गत आर्थिक वर्षको सोही अवधिसम्मा बैंकले ५ अर्ब ११ करोड रुपैयाँ नाफा कमाएको थियो। खुद ब्याज आम्दानी बढेपनि बैंकको खर्च बढेका कारण खुद नाफा सामान्य घट्न पुगेको हो।

समीक्षा अवधिमा बैंकको खुद ब्याज आम्दानी ३.७२ प्रतिशत र खुद फि तथा कमिशन आम्दानी ११.४० प्रतिशत बढेको छ। त्यस्तै, बैंकको कुल सञ्चालन आम्दानी समीक्षा अवधिमा ४.३५ प्रतिशत बढेको छ भने सञ्चालन मुनाफा १०.७२ प्रतिशत घटेको छ। चैत मसान्तसम्ममा बैंकको वितरणयोग्य मुनाफा १ अर्ब ५४ करोड रुपैयाँ रहेको छ भने प्रतिसेयर वितरणयोग्य आम्दानी ७ रुपैयाँ ६२ पैसा रहेको छ।

नाफासँगै बैंकको प्रतिसेयर आम्दानी पनि घटेको छ। समीक्षा अवधिमा बैंकको यस्तो आम्दानी २ रुपैयाँ २१ पैसा घटेर २३ रुपैयाँमा झरेको छ। सो अवधिसम्ममा बैंकको मूल्य आम्दानी अनुपात १८.८५ गुणा रहेको छ भने प्रतिसेयर नेटवर्थ २०८ रुपैयाँ ३९ पैसा रहेको छ।

२७ अर्ब ५ करोड रुपैयाँ चुक्ता पूँजी रहेको यस बैंकको जगेडा कोषमा २९ अर्ब ३२ करोड रुपैयाँ सञ्चित छ। चैत अन्त्यसम्ममा बैंकले ४ खर्ब ४० अर्ब रुपैयाँ निक्षेप संकलन गरी ३ खर्ब ६८ अर्ब कर्जा प्रवाह गरेको छ।