कुमारी बैंकको लिलामी सेयरमा आवेदन दिने समय थप

वाणिज्य न्युज
१२ बैशाख २०८१

कुमारी बैंकको लिलामी सेयरमा आवेदन दिने समय १ साता थप भएको छ । सरकारले हिजो वैशाख ११ गते सार्वजनिक विदा दिएको कारण पनि आवेदन दिने समय थप गर्नुपरेको बैंकले जनाएको छ । यो सँगै अब यसमा वैशाख १८ गतेसम्म आवेदन दिन सकिनेछ । यसअघि समय थप्नुअघि बैंकले मंगलबार (वैशाख ११ गते) सम्म आवेदन पाइने जानकारी गराएको थियो ।

बैंकले वैशाख ३ गतेदेखि ४ लाख ५० हजार कित्ता संस्थापक सेयर लिलामी बिक्री खुला गरेको हो । यस लिलामी सेयरमा बैंककै संस्थापक सेयरधनीसहित अन्य व्यक्ति, कम्पनी तथा संघसंस्थाले आवेदन दिन सक्नेछन् । यसमा न्यूनतम १०६ रुपैयाँ वा सो भन्दा बढी मूल्य कबोल गरी गोप्य शिलबन्दी बोलपत्र पेश गर्नुपर्नेछ ।

लगानीकर्ताले न्यूनतम १० हजार कित्तादेखि अधिकतम सबै कित्ताका लागि आवेदन दिन सक्नेछन् । बिक्री प्रबन्धक कुमारी क्यापिटल, नक्साल काठमाडौंमा पुग्ने गरी आवेदन बुझाउनुपर्नेछ ।