आन्तरिक हवाई यात्रु ११ प्रतिशतले बृद्धि, बुद्ध एयरमा यात्रा गर्ने अगाडि

वाणिज्य न्युज
१३ बैशाख २०८१

नेपालमा आन्तरिक हवाई यात्रुको वृद्धि उत्साहजनक देखिएको छ । सन् २०२४ को पहिलो ३ महिना त्रिभुवन अन्तर्राष्ट्रिय विमानस्थल हुँदै १० लाख २० हजार ७ सय ७६ जनाले आन्तरिक हवाई यात्रा गरेका छन् । अधिल्लो बर्षको तुलनामा यो आन्तरिक हवाई यात्रुको संख्या ११ प्रतिशतले बढेको हो । नेपाल नागरिक उड्डयन प्राधिकरण त्रिभुवन अन्तर्राष्ट्रिय विमानस्थल कार्यालयले दिएको तथ्यांकअनुसार सन् २०२३ को जनवरीदेखि फेब्रुअरीसम्म कुल ९ लाख १७ हजार १ सय ७७ जना यात्रुले आन्तरिक हवाई यात्रा गरेका थिए । यात्रु संख्या २०२३ को ३ महिनाको तुलनामा २०२४ को ३ महिनामा ११ प्रतिशतले बढेको हो ।

सन् २०२२ को पहिलो तीन महिना (जनवरी, फेब्रुअरी र मार्च)मा त्रिभुवन अन्तर्राष्ट्रिय विमानस्थल (टिआइए) हुँदै ११ लाख ४० हजार ६ सय ३२ यात्रुले आन्तरिक हवाई सेवा प्रयोग गरेका थिए ।

सन् २०२४ को तीन महिनामा सबैभन्दा बढी यात्रु बुद्धले बोकेको छ । बुद्धले तीन महिनामा ६ लाख ४८ हजार २ सय ६५ यात्रुलाई सेवा दिएको छ । यो संख्या त्रिभुवन अन्तर्राष्ट्रिय विमानस्थल हुँदै आन्तरिक हवाई यात्रा गर्ने यात्रुको ६३.५० प्रतिशत हो । अहिले बुद्ध एयरले दैनिक ९ हजारभन्दा बढी यात्रु बोकिरहेको छ । बुद्धको कुनै दिन १० हजारसम्म यात्रु पुगेका छन् । बुद्धले सरदर ९५ सयको हाराहारीमा यात्रु बोकिरहेको छ ।

यसैगरी यतीले १ लाख ९३ हजार ९ सय ७ जनालाई आन्तरिक हवाई सेवा दिएको छ । यसैगरी यतिले पनि दैनिक ३५ सय भन्दा बढी यात्रु बोकिरहेको छ । साथै श्रीले १ लाख २८ हजार ४ सय ४९ र सौर्यले २५ हजार ७ सय २० जनालाई सेवा दिएको छ । श्री एयरले पनि दैनिक २ हजारको संख्यामा यात्रु बोकिरहेको छ ।

अहिले कोभिडले थलिएका हेलिकोप्टरको बिजनेस पनि लयमा फर्किएको छ । वायुसेवा सञ्चालक संघका मनोज कार्कीका अनुसार अहिले हेलिकोप्टरको बिजनेस रिकभरीउन्मुख रहेको छ । वायुसेवा कम्पनीहरूका अनुसार अप्रिलमा आन्तरिक हवाई यात्रुको संख्यामा नयाँ रेकर्ड कायम हुने छ । त्रिभुवन अन्तर्राष्ट्रिय विमानस्थलबाट हुने सबै उडानमा ९० प्रतिशतभन्दा बढी अकुपेन्सी देखिएको छ ।