नेपालको औद्योगिक कोरिडोरका रूपमा परिचित बारा जिल्लाको पर्सौनीमा साढे ५१ करोड रुपैयाँको लगानीमा एक नयाँ खानेतेल प्रशोधन उद्योग स्थापना हुने भएको छ। स्वदेशी बजारमा गुणस्तरीय खानेतेलको बढ्दो मागलाई सम्बोधन गर्ने उद्देश्यका साथ ‘भाइटल प्रो आयल उद्योग’ निर्माण कार्य अगाडि बढाइएको हो। कम्पनीले सन् २०२५ को सेप्टेम्बरमा उद्योग दर्ता प्रक्रिया पूरा गरी निर्माण कार्यलाई तीव्रता दिएको छ। यस उद्योगले विभिन्न मुलुकबाट आयात गरिने कच्चा पदार्थलाई आधुनिक प्रविधिमार्फत प्रशोधन गरी नेपालमै गुणस्तरीय तेल उत्पादन गर्ने लक्ष्य राखेको छ। उद्योग पूर्ण रूपमा सञ्चालनमा आएपछि यसले दैनिक २०० टनसम्म कच्चा तेल प्रशोधन गर्ने उच्च क्षमता राख्दछ, जसअन्तर्गत भटमास (सोयाबिन), सनफ्लावर (सूर्यमुखी) र तोरीको तेल मुख्य रूपमा उत्पादन गरिनेछ।
परियोजनाको वित्तीय व्यवस्थापनका लागि कम्पनीले ऋण र पूँजी (डेप्ट-इक्विटी) को अनुपात ७५:२५ कायम गरेको छ। जसअनुसार कुल लगानीमध्ये ३८ करोड रुपैयाँ विभिन्न बैंक तथा वित्तीय संस्थामार्फत वित्तीय व्यवस्थापन (कर्जा) गरिनेछ भने बाँकी १२ करोड ९० लाख रुपैयाँ उद्योगका प्रवर्द्धकहरूले स्व-पूँजी (इक्विटी) मार्फत जुटाउनेछन्। प्रवर्द्धकहरूले हालसम्म आयोजना स्थलमा ३ करोड रुपैयाँ प्रारम्भिक लगानी गरिसकेका छन्।
पछिल्लो समय नेपाली खानेतेल उद्योगहरूले कच्चा पदार्थ आयातमा भोगेका चुनौती र बजारको उतारचढावका बीच युवा व्यवसायी धिरजकुमार गुप्ताको नेतृत्वमा यो ठूलो परियोजना अघि बढाइएको हो। उद्योगले आफ्नो आगामी व्यावसायिक कारोबार र वित्तीय सहजताका लागि कुल १ अर्ब १० करोड रुपैयाँको कर्जा रेटिङ समेत गराएको छ।
रेटिङ विवरणअनुसार उद्योगले दीर्घकालीन कर्जातर्फ ४० करोड रुपैयाँ र व्यवसाय सञ्चालन का लागि आवश्यक पर्ने अल्पकालीन कर्जातर्फ ७० करोड रुपैयाँको रेटिङ गराएको हो। तराई कोरिडोरमा स्थापना हुन लागेको यस उद्योगले स्थानीय स्तरमा रोजगारी सिर्जना गर्नुका साथै आन्तरिक उत्पादनलाई बढावा दिन महत्वपूर्ण टेवा पुर्याउने विश्वास गरिएको छ।
