नेपाल लाइफ इन्स्योरेन्स कम्पनीले आफ्नो संस्थागत सामाजिक उत्तरदायित्वअन्तर्गत “लाइफ इज प्रिसिअस लेट्स अपलिफ्ट इट टुगेदर” भन्ने मूल नाराका साथ बृहत निःशुल्क स्वास्थ्य परीक्षण तथा रक्तदान कार्यक्रमको आयोजना गर्ने भएको छ। मानवीय जीवनको रक्षा र स्वास्थ्य सचेतना अभिवृद्धि गर्ने पवित्र उद्देश्य बोकेको यस अभियानमार्फत कम्पनीले सर्वसाधारणलाई आफ्नो स्वास्थ्यप्रति जिम्मेवार बन्न र रक्तदान जस्तो जीवनदान कार्यमा सहभागी हुन हार्दिक आह्वान गरेको छ।
कम्पनीले सार्वजनिक गरेको तालिकाअनुसार निःशुल्क स्वास्थ्य शिविर आगामी बैशाख २१ र २२ गते दुई दिनसम्म सञ्चालन हुनेछ। काठमाडौंको कमलादीस्थित नेपाल लाइफको केन्द्रीय कार्यालयमा बिहान ९ः३० बजेदेखि साँझ ६ः३० बजेसम्म आयोजना हुने यस शिविरमा सहभागी भई जोसुकैले पनि आफ्नो स्वास्थ्य परीक्षण गराउन सक्नेछन्। यसका साथै, रगतको अभावलाई न्यूनीकरण गर्ने उद्देश्यले बैशाख २१ गते बिहान ९ः३० बजेदेखि दिउँसो २ बजेसम्म कमलादीकै हेरिटेज प्लाजामा विशेष रक्तदान कार्यक्रम तय गरिएको छ।
यो अभियान काठमाडौंमा मात्र सीमित नभई देशव्यापी रूपमा सञ्चालन हुने गरी तयारी गरिएको छ। कम्पनीका अनुसार बैशाख २१ गते नै नेपालका सातै प्रदेशमा एकैसाथ रक्तदान कार्यक्रम आयोजना गरिनेछ, जसले गर्दा देशभरका इच्छुक रक्तदाताहरूले यस महादानमा सहभागी हुने अवसर पाउनेछन्। मानव जीवन बचाउने जस्तो गरिमामय कार्यमा योगदान पुर्याउन र सामाजिक सेवाको भावनालाई आत्मसात् गर्नका लागि यस वृहत स्वास्थ्य सचेतना तथा रक्तदान कार्यक्रममा सहभागी भई सफल बनाइदिन नेपाल लाइफ इन्स्योरेन्सले सबैमा विशेष अनुरोध गरेको छ।
