संसदीय सुनुवाइ समितिले प्रस्तावित प्रधानन्यायाधीश मनोजकुमार शर्माको नाम सर्वसम्मत रूपमा अनुमोदन गरेको छ । आज मंगलबार सिंहदरबारमा बसेको समितिको बैठकले उनीमाथिको सुनुवाइ प्रक्रिया पूरा गर्दै प्रधानन्यायाधीश नियुक्तिका लागि बाटो खुला गरेको हो ।
संसदीय सुनुवाइबाट अनुमोदन भएका प्रधानन्यायाधीश डा. मनोजकुमार शर्माको शपथ पनि आजै हुने भएको छ । उनको शपथ साँझ ६ बजेर १० मिनेटका लागि तय भएको सर्वोच्च अदालतका प्रवक्ता अर्जुन कोइरालाले जानकारी दिए । उनका अनुसार, प्रधानन्यायाधीश शर्माको पदभार ग्रहण पनि आजै हुनेछ ।
संसदीय सुनुवाइ समितिले शर्माविरुद्ध परेका उजुरी तथा विभिन्न जिज्ञासामाथि छलफल गरेपछि सर्वसम्मत निर्णय गर्दै अनुमोदन गरेको हो । सुनुवाइका क्रममा सांसदहरूले न्यायपालिकाको स्वतन्त्रता, न्याय सम्पादनमा पारदर्शिता, अदालतमा देखिएको ढिलासुस्ती, भ्रष्टाचार नियन्त्रण तथा नागरिकको न्यायमा पहुँचजस्ता विषयमा प्रश्न उठाएका थिए । शर्माले ती विषयमा आफ्नो धारणा राख्दै न्यायपालिकाको गरिमा र विश्वसनीयता कायम राख्न प्रतिबद्ध रहेको बताएका थिए ।
संवैधानिक परिषद्को सिफारिसमा प्रधानन्यायाधीश पदका लागि प्रस्तावित शर्माको नाम संसदीय सुनुवाइ समितिमा पुगेको थियो ।
मनोजकुमार शर्मा हाल सर्वोच्च अदालतका वरिष्ठ न्यायाधीशका रूपमा कार्यरत छन् । लामो न्यायिक अनुभव भएका शर्माले विभिन्न महत्वपूर्ण मुद्दामा फैसला गर्दै आएका छन् । उनी न्याय क्षेत्रमा शान्त, अध्ययनशील र कानूनी विषयमा गहिरो पकड भएका न्यायाधीशका रूपमा परिचित छन् ।
प्रधानन्यायाधीश पद लामो समयदेखि रिक्त रहँदा सर्वोच्च अदालतको प्रशासनिक तथा न्यायिक कार्यसम्पादन प्रभावित हुँदै आएको थियो । शर्माको अनुमोदनसँगै न्यायपालिकाले स्थायी नेतृत्व पाउने अपेक्षा गरिएको छ ।
कानून व्यवसायी तथा न्याय क्षेत्रका सरोकारवालाहरूले पनि नयाँ नेतृत्वबाट न्याय सम्पादनलाई प्रभावकारी, पारदर्शी र विश्वसनीय बनाउने आशा व्यक्त गरेका छन् ।
