शिक्षामन्त्री सस्मित पोखरेलसँग नेपालका लागि अमेरिकी कार्यवाहक राजदूत स्कट अर्बमले सिंहदरबारस्थित मन्त्रालयमा भेटेका छन्। यो भेटमा उनीहरूबीच नेपाल र अमेरिकाबीचको पुरानो मित्रता, दुई देशको साझा हित र अझ बलियो सहकार्यका विषयमा खुलेर कुराकानी भयो। विशेष गरी शिक्षा र खेलकुदका क्षेत्रमा अमेरिकी सरकारले गर्दै आएको सहयोगलाई कसरी अझ प्रभावकारी बनाउने, सीपमूलक र प्राविधिक शिक्षालाई कसरी अघि बढाउने भन्नेबारे उनीहरूबीच छलफल भएको थियो।
अमेरिकाले नेपालको शिक्षामा लामो समयदेखि साथ दिँदै आएको कुरालाई सम्झिँदै भेटवार्ता अघि बढेको थियो। युएसआइडी मार्फत साना बालबालिकाका लागि चलाइएका पढ्ने–सिक्ने कार्यक्रमहरू र कलेज अफ एजुकेशनमा अमेरिकाले गरेको सहयोगको मन्त्रीले प्रशंसा गरे। दुई देशबीचको यो ऐतिहासक र विश्वासिलो सम्बन्ध आगामी दिनमा अझ गाढा बन्दै जाने आशा पनि उनले व्यक्त गरे।
आफ्नो मन्त्रालयले गरिरहेका सुधारका कामबारे बताउँदै मन्त्रीले अबको शिक्षालाई सैद्धान्तिक मात्र नबनाएर व्यवहारिक बनाउन पाठ्यक्रम परिमार्जन भइरहेको जानकारी दिए। अब विद्यालयस्तरदेखि नै खेलकुदलाई पाठ्यक्रममा समेट्न लागिएको र विद्यालयहरूको भौतिक अवस्था मूल्याङ्कन गरेर सोही अनुसार बजेट बाँडफाँड गरिने योजना उनले सुनाए। साथै, सुरक्षित भवन, डिजिटल सिकाइ, शिक्षक तालिम र पोषण जस्ता विषयमा अमेरिकाले अझ बढी सहकार्य गर्न सक्ने सम्भावना उनले औंल्याए।
जवाफमा राजदूत अर्बमले नेपालको शिक्षा र खेलकुदको विकासका लागि आवश्यक सहयोग गर्न अमेरिका सधैँ तयार रहेको बताए। नेपाल सरकार र शिक्षा मन्त्रालयले थालेका यी राम्रा सुधारका प्रयासहरूबारे अमेरिकी सरकार जानकार रहेको र सार्वजनिक शिक्षा सुधार्न नेपालले गरेको कोसिसमा अमेरिकाको निरन्तर साथ रहने प्रतिबद्धता उनले जनाए।
