खानीखोला हाइड्रोपावर कम्पनी लिमिटेडको विद्युत् बिक्री आम्दानी बढेसँगै कम्पनीको घाटामा कमी आएको छ । कम्पनीले चालु आर्थिक वर्षको तेस्रो त्रैमाससम्म विद्युत् बिक्रीमार्फत ८ करोड ६५ लाख रुपैयाँ आर्जन गरेको छ । यो रकम अघिल्लो आवको सोही अवधिको तुलनामा ५४.४७ प्रतिशतले बढी हो ।
कम्पनीले अघिल्लो आवसम्म विद्युत् बिक्रीबाट ५ करोड ६० लाख रुपैयाँ आर्जन गरेको थियो । आम्दानी बढेसँगै कम्पनीको घाटा कम भएको छ । अघिल्लो आवमा ४ करोड ९३ लाख रुपैयाँबराबरको खुद घाटा व्यहोरेको कम्पनीले चालु आवको तेस्रो त्रैमाससम्म १ करोड ४५ लाख घाटा व्यहोरेको छ ।
त्यस्तै, कम्पनीको वित्त खर्च घटेको छ । अघिल्लो आवमा ५ करोड ६५ लाख रुपैयाँ रहेको कम्पनीको वित्त खर्च घटेर ४ करोड २६ लाखमा सीमित बनेको छ । कम्पनीको रिजर्भको आकार भने १० करोड ६४ लाखले ऋणात्मक अवस्थामा रहेको छ ।
समीक्षा अवधिसम्म कम्पनीको प्रतिसेयर आम्दानी(ईपीएस) १.५६ रुपैयाँ ऋणात्मक, प्रतिसेयर नेटवर्थ ८८.५७ रुपैयाँ, पीई रेसियो १८३.९२ गुणा ऋणात्मक र तरलता अनुपात ८.४४ प्रतिशत कायम भएको छ ।
