प्रतिनिधिसभाको बैठक आज दिउँसो १ बजे संघीय संसद् भवन, सिंहदरबारमा बस्दैछ। बैठकमा विभिन्न मन्त्रालयसँग सम्बन्धित प्रश्नोत्तरदेखि नयाँ विधेयक प्रस्तुत गर्ने र केही विधेयक अघि बढाउनेसम्मका विषय कार्यसूचीमा राखिएका छन्।
संसद् सचिवालयले सार्वजनिक गरेको सम्भावित कार्यसूचीअनुसार आजको बैठकमा परराष्ट्र मन्त्रालय तथा युवा, श्रम तथा रोजगार मन्त्रालयसँग सम्बन्धित मौखिक प्रश्नको सम्बन्धित मन्त्रीहरूले जवाफ दिने कार्यक्रम छ। सांसदहरूले उठाएका प्रश्नमा सम्बन्धित मन्त्रीले जवाफ दिने भएकाले बैठकको प्रश्नोत्तर सत्रलाई चासोका साथ हेरिएको छ।
बैठकमा अर्थमन्त्री डा. स्वर्णिम वाग्लेले ‘कर्मचारी सञ्चय कोष (दशौँ संशोधन) विधेयक, २०८३’ प्रस्तुत गर्नेछन्। कर्मचारी सञ्चय कोषसँग सम्बन्धित कानुनी व्यवस्थालाई संशोधन तथा परिमार्जन गर्ने उद्देश्यले अघि बढाइएको उक्त विधेयक संसद्मा प्रस्तुत हुन लागेको हो।
त्यसैगरी कानुन, न्याय तथा संसदीय मामिलामन्त्री सोविता गौतमले ‘मेलमिलापसम्बन्धी (दोस्रो संशोधन) विधेयक, २०८३’ प्रस्तुत गर्ने कार्यसूची छ। न्यायिक प्रक्रियालाई सहज बनाउन वैकल्पिक विवाद समाधानको महत्वपूर्ण माध्यमका रूपमा रहेको मेलमिलापसम्बन्धी कानुनी व्यवस्थामा संशोधन गर्न यो विधेयक ल्याउन लागिएको हो।
युवा, श्रम तथा रोजगारमन्त्री रामजी यादवले ‘बालश्रम (निषेध तथा नियमित गर्ने) विधेयक, २०८३’ प्रस्तुत गर्नेछन्। बालबालिकालाई श्रममा लगाउने कार्य नियन्त्रण तथा विद्यमान व्यवस्थालाई थप व्यवस्थित गर्ने विषयसँग सम्बन्धित यो विधेयक पनि आज प्रतिनिधिसभामा प्रवेश गर्नेछ।
यसैगरी प्रधानमन्त्री वालेन्द्र शाहको तर्फबाट कानुनमन्त्री गौतमले ‘संवैधानिक निकायका पदाधिकारीहरूको पारिश्रमिक, सेवाको शर्त र सुविधासम्बन्धी (पहिलो संशोधन) विधेयक, २०८३’ माथि विचार गरियोस् भन्ने प्रस्ताव प्रस्तुत गर्नेछिन्।
आजकै बैठकमा प्रधानमन्त्री शाहकै तर्फबाट मन्त्री गौतमले राज्य व्यवस्था तथा सुशासन समितिको प्रतिवेदनसहितको ‘नेपाल विशेष सेवा ऐन, २०४२ को साविकको व्यवस्था जगाउनेसम्बन्धी विधेयक, २०८३’ पारित गरियोस् भन्ने प्रस्ताव पनि पेस गर्ने कार्यसूची छ।
यससँगै संसद्को गतिविधि प्रतिनिधिसभाको बैठकमा मात्र सीमित रहने छैन। आजै विभिन्न चारवटा संसदीय समितिका बैठक पनि बस्दैछन्। ती समितिमा पूर्वाधार विकास समिति, शिक्षा, स्वास्थ्य तथा सूचना प्रविधि समिति, विकास, आर्थिक मामिला तथा सुशासन समिति र संघीयता सबलीकरण तथा राष्ट्रिय सरोकार समिति छन्।
बिहान १० बजे बस्ने पूर्वाधार विकास समितिले राष्ट्रिय गौरवका आयोजनाको अध्ययन गर्न गठित उपसमितिको प्रतिवेदनमाथि छलफल गर्नेछ। राष्ट्रिय महत्वका आयोजनाको प्रगति, कार्यान्वयन अवस्था र चुनौतीबारे प्रतिवेदनले उठाएका विषयमा समितिमा छलफल हुने अपेक्षा गरिएको छ।
शिक्षा, स्वास्थ्य तथा सूचना प्रविधि समितिको बैठक भने बिहान ९ बजे बस्नेछ। उक्त बैठकमा ‘राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१’ सम्बन्धमा छलफल गरिनेछ।
त्यस्तै बिहान ११ः३० बजे बस्ने विकास, आर्थिक मामिला तथा सुशासन समितिको बैठकमा ‘राष्ट्रिय सदाचार नीति, २०८३’ कार्यान्वयनका विषयमा छलफल हुनेछ। सार्वजनिक प्रशासन र शासन प्रणालीमा सदाचार कायम गर्ने उद्देश्यसँग जोडिएको उक्त नीतिको कार्यान्वयन पक्षबारे समितिले समीक्षा गर्नेछ।
संघीयता सबलीकरण तथा राष्ट्रिय सरोकार समितिको बैठकमा भने समितिको बैठक सञ्चालन कार्यविधिसम्बन्धी विषयमा छलफल हुनेछ।
यसरी आज प्रतिनिधिसभाको बैठकसँगै चारवटा संसदीय समितिका गतिविधि पनि एकैदिन अघि बढ्ने भएका छन्। विधेयक निर्माण, कानुनी संशोधन, बालश्रम नियन्त्रण, संवैधानिक निकायका पदाधिकारीको सेवा–सुविधा तथा राष्ट्रिय महत्वका नीतिगत विषय आजको संसदीय कार्यसूचीका प्रमुख विषय बनेका छन्।
