नेपालको शेयर बजारमा सूचीकृत विभिन्न कम्पनीहरूले चालु आर्थिक वर्ष २०८२/८३ को नाफाबाट आफ्ना शेयरधनीहरूलाई लाभांश वितरण गर्ने घोषणा प्रक्रियालाई निकै तीव्रता दिएका छन्। दोस्रो बजारमा सूचीकृत कम्पनीहरूले वार्षिक साधारण सभा र लाभांश प्रस्तावलाई अघि बढाएसँगै लगानीकर्ताहरूमा पनि नयाँ उत्साह थपिएको देखिन्छ।
हालसम्म सार्वजनिक विवरण अनुसार बैंक तथा वित्तीय संस्था, जलविद्युत, उत्पादन तथा प्रशोधन, होटल तथा पर्यटन, एवं लघुवित्त क्षेत्रका कम्पनीहरूले प्रतिफल घोषणा गरिसकेका छन्। यसका साथै विभिन्न म्युचुअल फन्डहरूले पनि आफ्ना इकाइधनीहरूका लागि प्रतिफल -नगद लाभांश) को घोषणा गरिसकेका छन्।
यसरी लाभांश घोषणा गर्ने कम्पनीहरूको सूचीमा हालसम्मकै उच्च प्रतिफल प्रस्ताव गरेर रिलायन्स स्पिनिङ मिल्स लिमिटेड सबैभन्दा अगाडि देखिएको छ। कम्पनीले यस पटक आफ्ना शेयरधनीहरूलाई ३० प्रतिशत नगद लाभांश दिने आकर्षक प्रस्ताव अघि सारेको हो।
रिलायन्स स्पिनिङ मिल्स उत्पादन तथा प्रशोधन क्षेत्रको एक प्रमुख कम्पनी हो, जसले गत आर्थिक वर्ष २०८१/८२ मा भने शेयरधनीहरूलाई कुनै पनि लाभांश वितरण गरेको थिएन। अघिल्लो वर्ष शून्य लाभांश रहेकोमा यस पटक एकैपटक ३० प्रतिशत नगद लाभांश घोषणा गरेपछि शेयर बजारमा यस कम्पनीको विशेष चर्चा र आकर्षण बढेको छ।
