महालक्ष्मी विकास बैंकले विक्रम संवत् २०८३ लाई ‘विद्युतीय कारोबार प्रवर्द्धन वर्ष’ का रूपमा मनाउने घोषणा गर्दै विभिन्न ग्राहकमुखी योजनाहरू ल्याएको छ। बैंकको मोबाइल वित्तीय सेवामार्फत वैशाख पहिलो साता कारोबार गर्ने ग्राहकहरूमध्ये गोलाप्रथाबाट छानिने तीन जोडीलाई पोखरा, चितवन र मनकामनाको भ्रमण प्याकेज प्रदान गरिने बैंकले जनाएको छ। साथै, विद्युतीय माध्यमबाट भुक्तानी गर्दा ग्राहकले उपहार स्वरूप अंकहरू (रिवार्ड पोइन्ट) समेत प्राप्त गर्नेछन्।
त्यसैगरी, नयाँ वर्षकै अवसरमा बैंकले सुलभ ब्याजदरमा ‘महालक्ष्मी घर कर्जा’ योजना पनि सञ्चालनमा ल्याएको छ। घरजग्गा खरिद, निर्माण वा मर्मतका लागि ल्याइएको यस ऋण सुविधामा ७ वर्षसम्म ब्याजदर परिवर्तन नहुने सुनिश्चित गरिएको छ। अधिकतम ३० वर्षसम्मको भुक्तानी अवधि रहने यो कर्जा देशभरका १०३ शाखाहरूबाट उपलब्ध हुने बैंकले उल्लेख गरेको छ।
