रिलायन्स स्पिनिङ मिल्स लिमिटेडले आर्थिक वर्ष २०८२/०८३ को तेस्रो त्रैमास ९चैत्र मसान्तसम्म० को अपरिष्कृत वित्तीय विवरण सार्वजनिक गरेको छ। हालै मात्र बुक बिल्डिङ विधिमार्फत सर्वसाधारणका लागि आईपीओ निष्कासन गरेको यस कम्पनीले सार्वजनिक निष्कासनपछि पनि आफ्नो वित्तीय अवस्था निकै सबल र सुरक्षित रहेको तथ्य विवरणमार्फत प्रमाणित गरेको छ। नेपालको पुँजीबजारमा नयाँ सूचिकृत भएका अधिकांश उत्पादनमूलक कम्पनीहरूले सुरुवाती चरणमा कमजोर वित्तीय अवस्था देखाउने परिपाटी चलिरहँदा रिलायन्सले भने लगानीकर्ताको मनोबल उच्च पार्ने गरी अत्यन्तै मजबुत र आशालाग्दो प्रतिवेदन बाहिर ल्याएको छ।
चालु आर्थिक वर्षको ९ महिनाको अवधिमा कम्पनीले व्यवसाय विस्तार र नाफा आर्जन दुवै क्षेत्रमा उत्कृष्ट प्रदर्शन गरेको छ। यस अवधिमा कम्पनीले कुल ७ अर्ब ४६ करोड ४ लाख रुपैयाँ बराबरको सञ्चालन आम्दानी (व्यापार) गरेको छ, जसले बजारमा कम्पनीको बलियो पकड र चुनौतीपूर्ण परिस्थितिमा पनि टिक्न सक्ने उच्च क्षमता (सर्भाइभल क्यापासिटी) लाई देखाउँछ। व्यापारसँगै कम्पनीको सञ्चालन नाफा ५३ करोड ४९ लाख ८८ हजार रुपैयाँ (कुल व्यापारको ७.२ प्रतिशत) रहेको छ भने सबै कर र खर्चहरू कट्टा गरेपछिको खुद नाफा २६ करोड ६९ लाख ९२ हजार रुपैयाँ पुगेको छ। यसरी कुल व्यापारको ३.६ प्रतिशत खुद नाफा आर्जन गरेर कम्पनीले आफूलाई वित्तीय रूपमा व्यावसायिक र नाफामूलक प्रमाणित गरेको छ।
कम्पनीको प्रतिसेयर आम्दानी र नेटवर्थको सूचक पनि निकै आकर्षक र लगानीकर्ता अनुकूल देखिएका छन्। सार्वजनिक गरिएको ९ महिनाको वित्तीय विवरणअनुसार कम्पनीको वार्षिक प्रतिसेयर आम्दानी २०.४२ रुपैयाँ कायम भएको छ भने प्रतिसेयर नेटवर्थ ४९७.३७ रुपैयाँ जस्तो उच्च बिन्दुमा रहेको छ। सामान्यतया नेपालका उत्पादनमूलक र उत्पादनमा आधारित उद्योगहरू सधैं कार्यशील पुँजी र नगद प्रवाह (तरलता) को समस्याबाट ग्रसित हुने गर्दछन्। तर, रिलायन्स स्पिनिङ मिल्सको हकमा भने तरलता अनुपात २.०० गुणा रहेको छ, जसको अर्थ कम्पनीसँग आफ्नो अल्पकालीन तथा तुरुन्तै तिर्नुपर्ने दायित्व सहजै भुक्तानी गर्न सक्ने क्षमता आवश्यकताभन्दा दोब्बर रहेको छ।
कम्पनीको पुँजी संरचना र जगेडा कोषको अवस्था हेर्दा यो व्यवसायिक रूपमा निकै परिपक्व र बलियो जगमा उभिएको देखिन्छ। हाल कम्पनीको चुक्ता पुँजी १ अर्ब ९० करोड रुपैयाँ रहेको छ भने कम्पनीको जगेडा कोष तथा अन्य इक्विटीमा ७ अर्ब ५५ करोड रुपैयाँ सञ्चित छ, जुन चुक्ता पुँजीको झन्डै ४ गुणा बढी हो। कुल १४ अर्ब ८६ करोड रुपैयाँ बराबरको सम्पत्ति रहेको रिलायन्सको कुल ऋण दायित्व २ अर्ब ५५ करोड रुपैयाँ मात्र रहेको छ, जसमा दीर्घकालीन ऋण १ अर्ब ९५ करोड र अल्पकालीन ऋण ६० करोड २७ लाख रुपैयाँ छ। यो ९ महिनाको अवधिमा कम्पनीले २२ करोड १० लाख रुपैयाँ ब्याज तथा वित्तीय खर्च भुक्तानी गर्नुका साथै राज्यलाई ४ करोड ७० लाख ९५ हजार रुपैयाँ आयकर समेत तिरेको छ।
रिलायन्स स्पिनिङ मिल्स लिमिटेड नेपालको धागो उत्पादन र निर्यात क्षेत्रकै सबैभन्दा अग्रणी, स्थापित र ठूलो आधुनिक उद्योग हो। सुनसरीको दुहबीमा रहेको यस उद्योगले अत्याधुनिक प्रविधि र मेशिनरी प्रयोग गरेर अन्तर्राष्ट्रिय स्तरको उच्च गुणस्तरको धागो उत्पादन गर्दै स्वदेशी बजारको माग पूरा गर्नुका साथै भारत, टर्की लगायतका विभिन्न मुलुकहरूमा ठूलो परिमाणमा निर्यात गर्दै आएको छ। लामो व्यावसायिक इतिहास बोकेको यस कम्पनीले नेपालको आयात प्रतिस्थापन र वैदेशिक मुद्रा आर्जनमा मात्र नभई हजारौं नेपालीलाई प्रत्यक्ष रोजगारी दिएर अर्थतन्त्रमा ठूलो योगदान पुर्याएको छ। बुक बिल्डिङ विधिमार्फत प्रिमियम मूल्यमा आईपीओ जारी गरेको यस कम्पनीले सार्वजनिक निष्कासनपछि पनि आफ्नो बलियो वित्तीय साख र व्यावसायिक परिपक्वता जोगाउन सफल भई लगानीकर्ताका लागि एक भरपर्दो संस्थाको रूपमा आफूलाई प्रस्तुत गरेको छ।
