आज २५६७ औँ बुद्ध जयन्ती आज, शान्तिका अग्रदूत बृद्धको पूजा आराधना गरी मनाइँदै
आज २५६७ औँ बुद्ध जयन्ती । शान्तिका अग्रदूत गौतम बुद्धको पूजा आराधना र बुद्ध धर्मको महत्त्वबारे प्रवचनसहित मनाइँदै छ ।
यसै अवसरमा सिद्धार्थ गौतम बुद्धको जन्मस्थल लुम्बिनीमा आज विशेष समारोह आयोजना गरिँदै छ । बुद्ध जयन्ती मनाउन लुम्बिनी क्षेत्रलाई सिँगारेर मनमोहक बनाइएको छ । मायादेवी मन्दिर, अशोक स्तम्भलगायतका पुरातात्त्विक संरचनाहरूमा रङ रोगन तथा सरसफाइ गरिएको छ । मन्दिर तथा उद्यान क्षेत्रमा झिलिमिली बत्ती जडान गरिनुका साथै तथा ठाउँ ठाउँमा बुद्ध वचन, वाणी र पञ्चशीलका नयाँ तुल ब्यानर टाँगिएका छन् ।
त्यस्तै काठमाडौंको स्वयम्भू र बौद्धमा पनि विशेष बुद्ध जयन्तीकै अवसरमा समारोह हुँदै छ । बुद्धको जन्म, ज्ञान प्राप्ति र महापरिनिर्वाण वैशाख शुक्ल पूर्णिमाकै दिन अर्थात् आजकै दिन भएकोले विभिन्न गुम्बा तथा बुद्ध धर्म मान्ने सम्प्रदायको क्षेत्रमा पनि आज विशेष समारोह हुँदै छ ।
बुद्ध जयन्तीका अवसरमा शुभकामना दिँदै प्रधानमन्त्री पुष्पकमल दाहालले बुद्धको ज्ञान, आदर्श र शान्तिको मार्ग विश्वभर नै अद्वितीय रहेको उल्लेख गरेका छन् । बुद्धको दर्शन र शिक्षाप्रति गौरव गर्दै मानव जातिको हितका पक्षमा आपसी सद्भाव, सहकार्य र एकताका लागि अग्रसर हुनु नै बुद्धप्रतिको सच्चा सम्मान हुने प्रधानमन्त्रीको भनाई छ ।
प्रतिकृया दिनुहोस्